മിൽമ പാൽ വില ലിറ്ററിന് നാല് രൂപ കൂട്ടി; പുതുക്കിയ വില ജൂൺ ഒന്ന് മുതൽ പ്രാബല്യത്തിൽ

തിരുവനന്തപുരം: സംസ്ഥാനത്ത് മിൽമ പാൽ വില വർധിപ്പിച്ചു. ലിറ്ററിന് നാല് രൂപയാണ് വർധിപ്പിച്ചത്. പുതുക്കിയ വില ജൂൺ ഒന്നാം തീയതി മുതൽ പ്രാബല്യത്തിൽ വരും. പാൽ വില വർധിപ്പിക്കുന്ന കാര്യം മുഖ്യമന്ത്രി വി.ഡി.സതീശനെ ധരിപ്പിച്ചതായി മിൽമ ചെയർമാൻ കെ.എസ്.മണി അറിയിച്ചു.

​മിൽമയുടെ ഡയറക്ടർ ബോർഡ് യോഗത്തിലാണ് വില വർധനവ് സംബന്ധിച്ച അന്തിമ തീരുമാനമുണ്ടായത്. ഇതനുസരിച്ച് നിലവിൽ 52 രൂപയുള്ള പാൽ വില ലിറ്ററിന് 56 രൂപയായി ഉയരും. മുൻ സർക്കാർ തന്നെ ഈ വില വർധനവിന് തത്വത്തിൽ അംഗീകാരം നൽകിയിരുന്നതാണ്. വർധിപ്പിക്കുന്ന തുകയിൽ 3.33 രൂപയും നേരിട്ട് കർഷകന് ലഭിക്കുന്ന രീതിയിലാണ് പുതിയ ക്രമീകരണം. പാലിന് വില കൂടുന്നതോടെ മിൽമ പുറത്തിറക്കുന്ന മറ്റ് പാലിതര ഉൽപ്പന്നങ്ങൾക്കും ആനുപാതികമായി വില വർധിക്കും.

​കഴിഞ്ഞ ഡയറക്ടർ ബോർഡ് യോഗത്തിൽ തന്നെ പാൽ വില വർധിപ്പിക്കാൻ തീരുമാനമെടുത്തിരുന്നെങ്കിലും, നിയമസഭാ തിരഞ്ഞെടുപ്പ് പെരുമാറ്റച്ചട്ടം നിലവിലുണ്ടായിരുന്നതിനാലാണ് പ്രഖ്യാപനവും നടത്തിപ്പും നീണ്ടുപോയത്. ഭരണം മാറിയതിന് ശേഷം പുതിയ മുഖ്യമന്ത്രിയെ കണ്ട് അനുമതി വാങ്ങിയ ശേഷമാണ് മിൽമ ഔദ്യോഗിക തീരുമാനം പുറത്തുവിട്ടത്.