കിടപ്പുരോഗിയായ സുവർണന്റെ അതിജീവനത്തിന്റെ 'സുവർണകുടകൾ'; വിൽപ്പന ഉദ്ഘാടനം ചെയ്തു

നടുവണ്ണൂർ: കെട്ടിടത്തിന് മുകളിൽനിന്ന് വീണ് പരിക്കേറ്റ് 16 വർഷമായി കിടപ്പിലായ നിർമാണത്തൊഴിലാളി സുവർണൻ കിളിയാടത്ത് കിടന്നുകൊണ്ട് നിർമിച്ച കുടകളുടെ വിപണന ഉദ്ഘാടനം ഡോ. ആബിദ പുതുശ്ശേരി നിർവഹിച്ചു. ചടങ്ങിൽ നടുവണ്ണൂർ ഗ്രാമപ്പഞ്ചായത്ത് 12-ാം വാർഡ് മെമ്പർ ബിന്ദു കുട്ടിക്കണ്ടി അധ്യക്ഷത വഹിച്ചു. ടി.പി. ദാമോദരൻ, മലോൽ പി. നാരായണൻ നായർ, അശോകൻ കക്കഞ്ചേരി, ജീജ സിസ്റ്റർ, കൊടോളി ശ്രീധരൻ, പി.കെ. നാരായണൻ, എൻ. ആലി, സി.എം. നാരായണൻ, സുവർണൻ കിളിയാടത്ത് എന്നിവർ ചടങ്ങിൽ സംസാരിച്ചു.

​വലിയൊരു വായനാപ്രേമി കൂടിയായ സുവർണന്, പ്രശസ്തമായ 'കുട നന്നാക്കുന്ന ചോയി' എന്ന നോവൽ വായിച്ചതാണ് കിടക്കയിൽ ഇരുന്ന് കുടകൾ നിർമിക്കാനുള്ള പ്രധാന പ്രചോദനമായത്. ഓരോ വർഷവും താൻ തയ്യാറാക്കുന്ന കുടകളുടെ ഉദ്ഘാടനം ഔദ്യോഗികമായി സംഘടിപ്പിച്ചാണ് ഇദ്ദേഹം വിൽപ്പന നടത്താറുള്ളത്. ശാരീരിക ബുദ്ധിമുട്ടുകളോട് പടവെട്ടി സുവർണൻ നിർമിക്കുന്ന ഈ കുടകൾ വാങ്ങി അദ്ദേഹത്തെ സഹായിക്കാൻ താല്പര്യമുള്ളവർക്ക് നേരിട്ട് ബന്ധപ്പെടാവുന്നതാണ്.

​കുട ആവശ്യമുള്ളവർ സുവർണനെ ഫോണിൽ ബന്ധപ്പെട്ടാൽ നടുവണ്ണൂർ പാലിയേറ്റീവ് കെയർ സൊസൈറ്റി വൊളന്റിയർമാർ കുടകൾ ആവശ്യക്കാരുടെ പക്കൽ എത്തിച്ചുനൽകും. കഠിനമായ ജീവിതസാഹചര്യത്തിലും സ്വയംതൊഴിലിലൂടെ മുന്നേറുന്ന സുവർണനെ പിന്തുണയ്ക്കാൻ താല്പര്യമുള്ളവർക്ക് 7034427602 എന്ന ഫോൺ നമ്പറിൽ ബന്ധപ്പെടാവുന്നതാണ്.