ലഹരിക്കെതിരേ 'കായികലഹരി': സ്‌പോർട്‌സ് കിറ്റുകൾ വിതരണം ചെയ്തു

​പനമരം: വർധിച്ചുവരുന്ന ലഹരി ഉപയോഗത്തിനെതിരേ യുവതലമുറയെ കായികരംഗത്തേക്ക് ആകർഷിക്കുക എന്ന ലക്ഷ്യത്തോടെ 'ലഹരിക്കെതിരേ കായികലഹരി' പരിപാടി സംഘടിപ്പിച്ചു. പനമരം ഗവ. ഹയർസെക്കൻഡറി സ്‌കൂൾ വിമുക്തി ക്ലബ്ബിന്റെയും എക്സൈസ് വകുപ്പിന്റെയും സംയുക്ത ആഭിമുഖ്യത്തിലാണ് പദ്ധതി നടപ്പിലാക്കിയത്. നെഗറ്റീവ് ലഹരികൾ പൂർണമായും ഉപേക്ഷിച്ച് കായികവിനോദങ്ങളിലൂടെ ജീവിതം ആസ്വാദ്യകരമാക്കാൻ യുവാക്കളെ പ്രേരിപ്പിക്കുകയാണ് ഈ ഉദ്യമത്തിലൂടെ ലക്ഷ്യമിടുന്നത്.

​പദ്ധതിയുടെ ഭാഗമായി പനമരം കേന്ദ്രീകരിച്ച് പ്രവർത്തിക്കുന്ന വിവിധ സ്പോർട്സ് ക്ലബ്ബുകൾക്കുള്ള ക്രിക്കറ്റ് ബാറ്റ്, ബോൾ എന്നിവ ഉൾപ്പെട്ട കിറ്റുകൾ വിതരണം ചെയ്തു. പനമരം ടൗണിലെ വ്യവസായി സി.പി. സലിം, മാനന്തവാടി എക്സൈസ് റെയ്ഞ്ച് പ്രിവന്റീവ് ഓഫീസർ ഇ. അനൂപ് എന്നിവർ ചേർന്നാണ് വിതരണോദ്ഘാടനം നിർവഹിച്ചത്. പ്രധാനാധ്യാപിക ഷീജ ജെയിംസ് അധ്യക്ഷത വഹിച്ച ചടങ്ങിൽ വിമുക്തി ക്ലബ് അധ്യാപകരായ കെ. രേഖ, ടി. നവാസ്, സിവിൽ എക്സൈസ് ഓഫീസർമാരായ കെ.യു. ജോബിഷ്, ടി.ആർ. പ്രണവ് തുടങ്ങിയവർ സംബന്ധിച്ചു.