ഹര്‍ത്താല്‍ ആഹ്വാനം ചെയ്തവര്‍ക്കെതിരേ സ്വമേധയാ കേസെടുത്ത് ഹൈക്കോടതി

കൊച്ചി: ഡെന്റൽ കോളജ് വിദ്യാർത്ഥി നിതിൻ രാജിന്റെ മരണവുമായി ബന്ധപ്പെട്ട് സംസ്ഥാനത്ത് ഹർത്താൽ പ്രഖ്യാപിച്ചവർക്കെതിരെ കേരള ഹൈക്കോടതി സ്വമേധയാ കേസെടുത്തു. ജനജീവിതത്തെ സാരമായി ബാധിച്ച സാഹചര്യത്തിലാണ് കോടതിയുടെ അടിയന്തര ഇടപെടൽ. ജസ്റ്റിസുമാരായ ബസന്ത് ബാലാജി, പി. കൃഷ്ണകുമാർ എന്നിവരടങ്ങുന്ന അവധിക്കാല ഡിവിഷൻ ബെഞ്ചാണ് വിഷയം പരിഗണിച്ചത്. ഹർത്താലുമായി ബന്ധപ്പെട്ട് ഇന്ന് വൈകുന്നേരത്തിനകം റിപ്പോർട്ട് സമർപ്പിക്കാൻ ഡിജിപിക്ക് കോടതി നിർദ്ദേശം നൽകി.

​രോഗികളുമായി പോയ വാഹനങ്ങൾ പോലും തടയുന്ന ദൃശ്യങ്ങൾ പുറത്തുവന്നത് ഗൗരവകരമാണെന്ന് കോടതി നിരീക്ഷിച്ചു. ഹർത്താൽ ദിനത്തിൽ നടന്ന അതിക്രമങ്ങളെക്കുറിച്ച് ഡയറക്ടർ ജനറൽ ഓഫ് പ്രോസിക്യൂഷനോട് കോടതി വിശദീകരണം തേടിയിട്ടുണ്ട്. ഹർത്താലിന് ആഹ്വാനം ചെയ്ത നടപടി കോടതിയലക്ഷ്യമാണെന്ന് വിലയിരുത്തിയ ബെഞ്ച്, ബന്ധപ്പെട്ടവർക്ക് നോട്ടീസ് അയക്കാൻ ഹൈക്കോടതി രജിസ്ട്രിയോട് ആവശ്യപ്പെട്ടു. ഉച്ചയ്ക്ക് ശേഷം കേസ് വീണ്ടും പരിഗണിക്കുമ്പോൾ സർക്കാർ സ്വീകരിച്ച നടപടികൾ വ്യക്തമാക്കേണ്ടി വരും.

​നിതിൻ രാജിന്റെ മരണത്തിൽ പ്രതിഷേധിച്ച് ആക്ഷൻ കൗൺസിൽ ആഹ്വാനം ചെയ്ത ഹർത്താലിൽ സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായ പ്രതിഷേധങ്ങളും ഗതാഗത തടസ്സങ്ങളും ഉണ്ടായി. പലയിടങ്ങളിലും പ്രതിഷേധക്കാരും പൊലീസും തമ്മിൽ വാക്കുതർക്കമുണ്ടാവുകയും സമരക്കാരെ പൊലീസ് അറസ്റ്റ് ചെയ്ത് നീക്കുകയും ചെയ്തു. ഗതാഗതക്കുരുക്ക് മൂലം യാത്രക്കാരും രോഗികളും വലിയ തോതിൽ ബുദ്ധിമുട്ടിലായ പശ്ചാത്തലത്തിലാണ് ഹൈക്കോടതിയുടെ ഈ കർശന നടപടി.