കോഴിക്കോട് ബീച്ചിൽ ഡി.ടി.പി.സി. ശൗചാലയത്തിൽ നിന്ന് മലിനജലം പുറത്തേക്ക്: അധികൃതർ അവഗണിക്കുന്നതായി പരാതി

നഗരസഭയും നാട്ടുകാരും ചേർന്ന് കോഴിക്കോട് ബീച്ചിന്റെ ശുചിത്വം ഉറപ്പുവരുത്താൻ മാതൃകാപരമായ പ്രവർത്തനങ്ങൾ നടത്തുമ്പോഴും, മറുവശത്ത് ഡി.ടി.പി.സി.യുടെ ശൗചാലയത്തിൽ നിന്നുള്ള മലിനജലം പരിസരത്തേക്ക് ഒഴുകുന്നത് യാത്രക്കാരെയും വ്യാപാരികളെയും ഒരുപോലെ ദുരിതത്തിലാക്കുന്നു. ലയൺസ് പാർക്കിനോട് ചേർന്ന് പോർട്ട് വകുപ്പിന്റെ ഭൂമിയിൽ സ്ഥിതി ചെയ്യുന്ന ഈ പേ-ആൻഡ്-യൂസ് ശൗചാലയത്തിൽ നിന്നാണ് മലിനജലം പുറത്തേക്ക് ഒഴുക്കുന്നത്. നൂറുകണക്കിന് ആളുകൾ ദിവസവും ബീച്ചിലേക്ക് പോകാൻ ഉപയോഗിക്കുന്ന പ്രധാന വഴിയിലേക്കാണ് ഈ ദുർഗന്ധം വമിക്കുന്ന വെള്ളം ചാലുവെച്ച് ഒഴുക്കി വിട്ടിരിക്കുന്നത്.

​ശൗചാലയത്തിന് പുറകുവശത്ത് മാലിന്യങ്ങൾ കുന്നുകൂടി കിടക്കുന്നതിനൊപ്പം, വലതുഭാഗത്ത് കുഴിയെടുത്ത് മലിനജലം കെട്ടിനിർത്തിയിരിക്കുകയാണ്. ഇത് മറയ്ക്കാൻ തെർമ്മോകോൾ കഷണങ്ങളും മരക്കഷണങ്ങളും ഉപയോഗിച്ചിട്ടുണ്ടെങ്കിലും പരിസരത്തെ ഹോട്ടലുകൾക്കും യാത്രക്കാർക്കും ഇത് വലിയ ആരോഗ്യഭീഷണി ഉയർത്തുന്നു. പോർട്ടും ഡി.ടി.പി.സി.യും ഈ ഗുരുതരമായ വിഷയത്തിൽ എത്രയും വേഗം ഇടപെട്ട് ശുചിത്വം ഉറപ്പാക്കണമെന്നാണ് നാട്ടുകാരുടെ ആവശ്യം.