പൂവാട്ടുപറമ്പിൽ വൻ മോഷണം; അടച്ചിട്ട വീട് കുത്തിത്തുറന്ന് 10 പവനും ഡയമണ്ട് കമ്മലുകളും കവർന്നു

കോഴിക്കോട്: നഗരത്തെ ഞെട്ടിച്ച് പൂവാട്ടുപറമ്പിൽ വൻ മോഷണം. അടച്ചിട്ട വീട് കുത്തിത്തുറന്ന മോഷ്താക്കൾ പത്ത് പവൻ സ്വർണ്ണാഭരണങ്ങളും, മുപ്പതിനായിരം രൂപയും വിലപിടിപ്പുള്ള ഡയമണ്ട് കമ്മലുകളും കവർന്നു. കോഴിക്കോട് ജില്ലാ പഞ്ചായത്ത് അസിസ്റ്റന്റ് എൻജിനീയർ ദിവ്യ വാടകയ്ക്ക് താമസിക്കുന്ന വീട്ടിലാണ് കവർച്ച നടന്നത്.

ദിവ്യയും കുടുംബവും സ്വദേശമായ തൃശ്ശൂരിലേക്ക് പോയ സമയത്തായിരുന്നു മോഷണം. ഇന്നലെ വൈകിട്ട് വീട്ടിൽ തിരിച്ചെത്തിയപ്പോഴാണ് വീടിന്റെ വാതിൽ കുത്തിത്തുറന്ന നിലയിൽ കണ്ടെത്തിയത്. തുടർന്ന് നടത്തിയ പരിശോധനയിലാണ് ആഭരണങ്ങളും പണവും നഷ്ടപ്പെട്ടതായി ബോധ്യപ്പെട്ടത്. പന്തീരാങ്കാവ് പൊലീസ് സ്ഥലത്തെത്തി കേസെടുത്ത് അന്വേഷണം ആരംഭിച്ചു.