'ഇനി ഒരാളെയും ആഭരണങ്ങൾ കൊണ്ട് തിരിച്ചറിയേണ്ടി വരരുത്'; മുണ്ടത്തിക്കോട് ദുരന്തത്തിന്റെ ഭീകരത വിവരിച്ച് ഫോറൻസിക് സർജൻ

തൃശൂർ മുണ്ടത്തിക്കോട് വെടിക്കെട്ട് പുരയിലുണ്ടായ സ്ഫോടനത്തിന്റെ ഭീകരത വിവരിച്ച് തൃശൂർ മെഡിക്കൽ കോളേജിലെ ഫോറൻസിക് സർജൻ ഹിതേഷ് ശങ്കർ പങ്കുവെച്ച കുറിപ്പ് ചർച്ചയാകുന്നു. പൂർണ്ണമായും കത്തിക്കരിഞ്ഞും ശരീരഭാഗങ്ങൾ ചിതറിത്തെറിച്ചും തിരിച്ചറിയാൻ പോലും കഴിയാത്ത അവസ്ഥയിലായിരുന്നു മൃതദേഹങ്ങളെന്ന് അദ്ദേഹം ഫേസ്ബുക്കിൽ കുറിച്ചു. പല ശരീരങ്ങളും എല്ലുകൾ വരെ വേർപെട്ട നിലയിലായിരുന്നു. കൈയിലെ മോതിരം, കാതിലെ കമ്മൽ, ഹൃദയത്തിലെ സ്റ്റെന്റ്, പല്ലിന്റെ പ്രത്യേകതകൾ എന്നിവ നോക്കിയാണ് പലരെയും തിരിച്ചറിഞ്ഞത്. ഒരു മനുഷ്യജീവിതം എത്ര എളുപ്പത്തിൽ ഇല്ലാതാകാം എന്നതിന്റെ ഭീകരമായ ഓർമ്മപ്പെടുത്തലാണ് ഈ ദുരന്തമെന്ന് അദ്ദേഹം പറയുന്നു.

​ആഘോഷങ്ങളെയും വെടിക്കെട്ടിനെയും പൂർണ്ണമായി നിരാകരിക്കേണ്ടതില്ലെങ്കിലും സുരക്ഷാ കാര്യങ്ങളിൽ അതീവ ജാഗ്രത വേണമെന്ന് ഹിതേഷ് ശങ്കർ ഓർമ്മിപ്പിക്കുന്നു. സ്ഫോടകവസ്തുക്കൾ നിർമ്മിക്കുന്ന ഇടവും അവ സൂക്ഷിക്കുന്ന ഇടവും കൃത്യമായി വേർതിരിക്കണം. ചെറിയ സ്ഥലത്ത് വലിയ അളവിൽ വെടിമരുന്ന് സൂക്ഷിക്കുന്നതും കൂടുതൽ തൊഴിലാളികൾ ഒരേസമയം ജോലി ചെയ്യുന്നതും അപകടസാധ്യത വർദ്ധിപ്പിക്കുന്നു. നിർമ്മാണശാലകൾ കർശനമായ മേൽനോട്ടത്തിലും ലൈസൻസിംഗിലും മാത്രമായിരിക്കണം പ്രവർത്തിക്കേണ്ടത്.

​ചൂട് കൂടുന്ന സമയങ്ങളിൽ ഇത്തരം ജോലികൾ ഒഴിവാക്കണമെന്നും തൊഴിൽ സമയം ശാസ്ത്രീയമായി ക്രമീകരിക്കണമെന്നും അദ്ദേഹം നിർദ്ദേശിക്കുന്നു. രാവിലെ നേരത്തെയും വൈകിട്ട് 3 മണിക്ക് ശേഷവും ജോലി നിജപ്പെടുത്തുന്നത് പരിഗണിക്കണം. ഒരു ദുരന്തം നടന്ന ശേഷം മാത്രം അന്വേഷണങ്ങൾ നടത്തുന്നതിന് പകരം, അത് തടയാൻ ആവശ്യമായ നിയമങ്ങൾ മുൻകൂട്ടി പരിഷ്കരിക്കണം. ഇനി ഒരാളെയും തിരിച്ചറിയാൻ ആഭരണങ്ങളുടെ സഹായം തേടേണ്ട സാഹചര്യം ഉണ്ടാവരുതെന്നും അദ്ദേഹം കൂട്ടിച്ചേർത്തു. ഏപ്രിൽ 21-ന് നടന്ന ഈ അപകടത്തിൽ ഇതുവരെ പതിനാല് പേർക്കാണ് ജീവൻ നഷ്ടമായത്.