തന്റെ ചിത്രമുപയോഗിച്ച് വ്യാജ ലോൺ പരസ്യം; ജാഗ്രതാനിർദേശവുമായി അജു വർഗീസ്

തന്റെ അനുമതിയില്ലാതെ ചിത്രം ഉപയോഗിച്ച് പരസ്യം നൽകുന്ന ലോൺ ആപ്പുകൾക്കെതിരെ മുന്നറിയിപ്പുമായി നടൻ അജു വർഗീസ്. 'എ എം ട്രസ്റ്റ് ലോൺ സർവീസസ്' എന്ന സ്വകാര്യ പണമിടപാട് സ്ഥാപനത്തിന്റെ പരസ്യത്തിനെതിരെയാണ് താരം രംഗത്തെത്തിയത്. മൂന്ന് ലക്ഷം രൂപ വരെ കേരളത്തിൽ എവിടെയും ലോൺ നൽകുമെന്ന വാഗ്ദാനത്തോടെ പ്രചരിക്കുന്ന ഈ പരസ്യത്തിൽ അജു വർഗീസിന്റെ ചിത്രവും ഉൾപ്പെടുത്തിയിരുന്നു.

​ഈ പരസ്യവുമായി തനിക്ക് യാതൊരു ബന്ധവുമില്ലെന്നും തന്റെ അറിവോ സമ്മതമോ ഇല്ലാതെയാണ് ചിത്രങ്ങൾ ഉപയോഗിച്ചിട്ടുള്ളതെന്നും അജു വ്യക്തമാക്കി. "ഇതൊരു അനധികൃത ബാങ്കിംഗ് സ്ഥാപനമാണ്. ഇത്തരത്തിലുള്ള വ്യാജ വാഗ്ദാനങ്ങളിൽ വീണ് കഷ്ടപ്പെട്ട് ഉണ്ടാക്കിയ പണം ആരും നഷ്ടപ്പെടുത്തരുത്" എന്ന് താരം തന്റെ ഫേസ്ബുക്ക് കുറിപ്പിലൂടെ അഭ്യർത്ഥിച്ചു.

​ലോൺ ആപ്പുകൾ വഴി പണം കടമെടുക്കുന്നവർ ഭീഷണി നേരിടുകയും തട്ടിപ്പിനിരയാവുകയും ചെയ്യുന്ന വാർത്തകൾ വർധിച്ചുവരുന്ന സാഹചര്യത്തിലാണ് ജനങ്ങൾക്ക് ജാഗ്രത നൽകിക്കൊണ്ടുള്ള താരത്തിന്റെ ഈ പ്രതികരണം. ഇത്തരം തട്ടിപ്പുകളിൽ വീഴാതിരിക്കാൻ കൃത്യമായ പരിശോധനകൾ നടത്തണമെന്നും അദ്ദേഹം ഓർമ്മിപ്പിച്ചു.