പന്തീരാങ്കാവിൽ യാത്രാദുരിതം വിതച്ച് രൂക്ഷമായ ഗതാഗതക്കുരുക്ക്

പന്തീരാങ്കാവ്: ദേശീയപാത വികസനത്തിന്റെ ഭാഗമായുള്ള മേൽപ്പാലത്തിന് സമീപം പന്തീരാങ്കാവ് ജങ്ഷനിൽ വാഹനക്കുരുക്ക് രൂക്ഷമാകുന്നു. സർവീസ് റോഡിലെ പണികൾ പലയിടത്തും അപൂർണ്ണമായി തുടരുന്നതാണ് ഗതാഗത തടസ്സത്തിന് പ്രധാന കാരണമാകുന്നത്. ഇതിനുപുറമെ, ദേശീയപാതയിലെ ടോൾ ലാഭിക്കാനായി വലിയൊരു വിഭാഗം വാഹനങ്ങൾ ഇടറോഡുകൾ വഴി സർവീസ് റോഡിലേക്ക് പ്രവേശിക്കുന്നതും ജങ്ഷനിലെ തിരക്ക് വർദ്ധിപ്പിക്കുന്നു. ഇടുങ്ങിയ പാതകളിൽ വാഹനങ്ങൾ കുടുങ്ങുന്നതോടെ മണിക്കൂറുകളോളമാണ് യാത്രക്കാർ ദുരിതത്തിലാവുന്നത്. പണികൾ വേഗത്തിൽ പൂർത്തിയാക്കി ഗതാഗതം സുഗമമാക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.