ദേശീയപാതാ വികസനം: അഴിയൂർ മുതൽ കൈനാട്ടി വരെ നിർമ്മാണം വേഗത്തിൽ

ദേശീയപാത 66-ന്റെ ഭാഗമായ അഴിയൂർ മുതൽ വെങ്ങളം വരെയുള്ള പാതയിലെ നവീകരണ പ്രവർത്തനങ്ങൾ വലിയ വേഗതയിലാണ് മുന്നേറുന്നത്. വടകര അഴിയൂർ മുതൽ കൈനാട്ടി വരെയുള്ള ഭാഗത്തെ ജോലികൾ നിശ്ചിത സമയപരിധിക്കുള്ളിൽത്തന്നെ തീർക്കാനുള്ള ഊർജിത ശ്രമത്തിലാണ് അധികൃതർ. സോയിൽ നെയിലിങ് തകർന്ന ഭാഗത്തെ കോൺക്രീറ്റ് ഭിത്തിയുടെ നിർമ്മാണം പൂർത്തിയാകുന്നതാണ് നിലവിലെ പ്രധാന കടമ്പ. ഈ പ്രവൃത്തി ഒഴികെ ബാക്കിയുള്ളവ ഈ വർഷം ഡിസംബറിനുള്ളിൽത്തന്നെ പൂർത്തിയായേക്കും. അഴിയൂർ-വെങ്ങളം പാതയുടെ മൊത്തത്തിലുള്ള നവീകരണം 2027 മേയ് മാസത്തോടെ പൂർത്തിയാകുമെന്നാണ് പ്രതീക്ഷിക്കുന്നത്.

​തലശ്ശേരി-മാഹി ബൈപ്പാസിനെ അഴിയൂർ-വെങ്ങളം പാതയുമായി ഇതിനകം ബന്ധിപ്പിച്ചിട്ടുണ്ട്. കുഞ്ഞിപ്പള്ളിയിലെ അടിപ്പാതയും അനുബന്ധ റോഡുകളും പൂർത്തിയായതോടെ അവിടെ അവസാനഘട്ട ടാറിങ് പുരോഗമിക്കുകയാണ്. ചോമ്പാലയിലെ ടോൾപ്ലാസ കെട്ടിടത്തിന്റെ നിർമ്മാണം കഴിഞ്ഞു. റോഡിന്റെ ഇരുവശങ്ങളിലും ഡിവൈഡറുകളും ബാരിക്കേഡുകളും സ്ഥാപിക്കുന്ന ജോലികൾ ആരംഭിച്ചിട്ടുണ്ട്. ഇവിടെ ആറുവരിപ്പാത സജ്ജമായെങ്കിലും നിലവിൽ മൂന്നുവരിയിലൂടെയാണ് വാഹനങ്ങൾ കടത്തിവിടുന്നത്. ചോമ്പാല ഹാർബർ റോഡ് പരിസരത്ത് മാത്രമാണ് ഇനി അല്പം പണി ബാക്കിയുള്ളത്.

​കണ്ണൂക്കര അടിപ്പാതയുടെ ഒരു ഭാഗം പ്രവർത്തനസജ്ജമായെങ്കിലും മറുഭാഗത്തെ നിർമ്മാണം പുരോഗമിക്കുന്നതേയുള്ളൂ. മടപ്പള്ളിയിൽ അവസാനഘട്ടത്തിൽ അനുവദിച്ച അടിപ്പാതയുടെ മൂന്നുവരി ജോലികൾ പൂർത്തിയായിട്ടുണ്ട്. നാദാപുരം റോഡിലെ അടിപ്പാതയും അനുബന്ധ റോഡ് നിർമ്മാണവും ഇപ്പോൾ അന്തിമഘട്ടത്തിലാണ്.

​അതേസമയം, കൈനാട്ടി മുതൽ വടകര കരിമ്പനപ്പാലം വരെയുള്ള ഭാഗത്തെ നിർമ്മാണം ഇപ്പോഴും അനിശ്ചിതത്വത്തിലാണ്. നാല് മേൽപ്പാലങ്ങൾ, ഒരു ഉയരപ്പാത, രണ്ട് അടിപ്പാതകൾ എന്നിവയുടെ ജോലികളാണ് ഇവിടെ തടസ്സപ്പെട്ടിരിക്കുന്നത്. ഈ ഭാഗത്ത് മണ്ണിട്ടുയർത്തി റോഡ് നിർമ്മിക്കുന്നതിന് പകരം തൂണിന്മേൽ പാത നിർമ്മിക്കുന്നതിനുള്ള അനുമതിക്കായി എൻ.എച്ച്.എ.ഐ കാത്തിരിക്കുകയാണ്. ഈ അനുമതി ലഭിച്ചാൽ മാത്രമേ വടകര നഗരത്തോട് ചേർന്നുള്ള ഭാഗങ്ങളിലെ പ്രവൃത്തികൾക്ക് വേഗത കൈവരുകയുള്ളൂ.