കണിക്കൊരുങ്ങാൻ കോഴിക്കോട്; ചൂടിനെ വെല്ലുന്ന തിരക്കുമായി പാളയം വിപണി

കോഴിക്കോട്: കഠിനമായ ചൂടിനെ അവഗണിച്ചും നഗരത്തിലെ വിഷുവിപണി സജീവമാകുന്നു. പാളയത്തെ വഴിയോരക്കച്ചവടക്കാരും മാർക്കറ്റും വിഷുക്കാലത്തെ വരവേൽക്കാൻ പൂർണ്ണമായി സജ്ജമായിക്കഴിഞ്ഞു. കണിയൊരുക്കാനുള്ള വിഭവങ്ങളും സദ്യയ്ക്കുള്ള പച്ചക്കറികളും വാങ്ങാൻ വലിയ തിരക്കാണ് അനുഭവപ്പെടുന്നത്.

​കണിവെള്ളരിയാണ് ഇപ്പോൾ വിപണിയിലെ താരം. മാവൂർ, കുറ്റിക്കാട്ടൂർ, പെരുവയൽ തുടങ്ങിയ സമീപ പ്രദേശങ്ങളിൽ നിന്നാണ് പ്രധാനമായും വെള്ളരി പാളയത്ത് എത്തുന്നത്. കിലോയ്ക്ക് 50 രൂപ നിരക്കിലാണ് നിലവിൽ വെള്ളരിയുടെ വില്പന. വേനൽ കടുത്തതോടെ നാരങ്ങയ്ക്കും നെല്ലിക്കയ്ക്കും ആവശ്യക്കാർ ഏറിയിട്ടുണ്ട്. ഡിമാൻഡ് വർദ്ധിച്ചതോടെ നാരങ്ങ കിലോയ്ക്ക് 150 രൂപയായും നെല്ലിക്കയ്ക്ക് 80 രൂപയായും വില ഉയർന്നു.

​തമിഴ്‌നാട്ടിൽ നിന്നാണ് ആപ്പിൾ, മുന്തിരി, ഓറഞ്ച് തുടങ്ങിയ പഴവർഗ്ഗങ്ങൾ എത്തുന്നത്. ഇവയ്ക്കും പയർ, വെണ്ട, കൈപ്പ തുടങ്ങിയ പച്ചക്കറികൾക്കും വിപണിയിൽ ഇപ്പോൾ വില അല്പം കൂടുതലാണ്. എന്നാൽ മാങ്ങയുടെ സീസണായതിനാൽ പച്ചമാങ്ങ കിലോയ്ക്ക് 30 രൂപ നിരക്കിൽ സുലഭമായി ലഭിക്കുന്നുണ്ട്. ചൂട് കച്ചവടത്തെ നേരിയ തോതിൽ ബാധിക്കുന്നുണ്ടെങ്കിലും, ആഘോഷങ്ങൾ പൊലിപ്പിക്കാൻ സഞ്ചി നിറയെ സാധനങ്ങളുമായി മടങ്ങുന്ന ആളുകൾ മാർക്കറ്റിന് ഉണർവ് നൽകുന്നു. മുട്ടുപൊള്ളുന്ന വെയിലിലും പ്രതീക്ഷ കൈവിടാതെയാണ് പാളയത്തെ വ്യാപാരികൾ വിഷുവിപണിയെ നോക്കിക്കാണുന്നത്.