അകലാപ്പുഴയുടെ ഓളപ്പരപ്പിൽ ഭിന്നശേഷി കുട്ടികൾക്കൊപ്പം ബോട്ട് യാത്ര

ചോറോട്: ഭിന്നശേഷി വിഭാഗത്തിലുള്ള കുട്ടികൾക്ക് ആനന്ദവും പുതിയ അനുഭവങ്ങളും പകർന്ന് മിത്രം റെസിഡന്റ്സ് അസോസിയേഷന്റെ നേതൃത്വത്തിൽ ജലയാത്ര സംഘടിപ്പിച്ചു. ചോറോട് പഞ്ചായത്ത് ബഡ്‌സ് സ്കൂളിലെ ഇരുപത്തിയഞ്ചോളം വിദ്യാർഥികൾക്കായാണ് അകലാപ്പുഴയിൽ ബോട്ട് യാത്ര ഒരുക്കിയത്. കുട്ടികൾക്കൊപ്പം അവരുടെ രക്ഷിതാക്കളും ഗ്രാമപ്പഞ്ചായത്തംഗങ്ങളും റെസിഡന്റ്സ് അസോസിയേഷൻ ഭാരവാഹികളും ഈ സ്നേഹയാത്രയിൽ പങ്കുചേർന്നു.

​ജലയാത്രയുടെ ഔദ്യോഗിക ഉദ്ഘാടനം ചോറോട് പഞ്ചായത്ത് പ്രസിഡന്റ് ഷൈജി പ്രമോദ് നിർവഹിച്ചു. എം.വി. മനോജൻ അധ്യക്ഷത വഹിച്ച ചടങ്ങിൽ സി.കെ. സജിതകുമാരി, വി.കെ. അജേഷ് കുമാർ, പ്രസാദ് വിലങ്ങിൽ, അഞ്ജന ദിജേഷ്, അശോകൻ, രൂപേഷ്, രാജേഷ് തുടങ്ങിയവർ സംസാരിച്ചു. പ്രകൃതിഭംഗി ആസ്വദിച്ചുള്ള ഈ യാത്ര കുട്ടികൾക്ക് വേറിട്ടൊരു ലോകം പരിചയപ്പെടാനുള്ള അവസരമായി മാറി.