കൊയിലാണ്ടിയിൽ ലോറിയും ടൂറിസ്റ്റ് ബസും കൂട്ടിയിടിച്ചു: 30 പേർക്ക് പരിക്ക്

കൊയിലാണ്ടി കൊല്ലം പെട്രോൾ പമ്പിന് മുൻപിൽ കണ്ടെയ്നർ ലോറിയും ടൂറിസ്റ്റ് ബസും നേർക്കുനേർ കൂട്ടിയിടിച്ച് മുപ്പതോളം പേർക്ക് പരിക്കേറ്റു. ശനിയാഴ്ച പുലർച്ചെ 12.30-ഓടെയായിരുന്നു അപകടം. തിരഞ്ഞെടുപ്പ് ഡ്യൂട്ടി കഴിഞ്ഞ് മടപ്പള്ളിയിൽ നിന്ന് മലപ്പുറത്തേക്ക് പോലീസുകാരുമായി പോവുകയായിരുന്നു ടൂറിസ്റ്റ് ബസാണ് അപകടത്തിൽപ്പെട്ടത്.

​ഇടിയുടെ ആഘാതത്തിൽ ബസ് ഡ്രൈവർ ക്യാബിനുള്ളിൽ കുടുങ്ങിപ്പോയി. തുടർന്ന് കൊയിലാണ്ടിയിൽ നിന്ന് അഗ്നിരക്ഷാസേന എത്തിയാണ് ഇദ്ദേഹത്തെ പുറത്തെടുത്തത്. പരിക്കേറ്റ 28 പേരെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു. പോലീസുകാരെ കയറ്റിയ ബസായതിനാൽ ഉന്നത പോലീസ് ഉദ്യോഗസ്ഥരും സ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി.