പന്തിരാങ്കാവിൽ സ്കൂട്ടർ കവർന്ന സംഘം പിടിയിൽ; ഒരാൾക്കായി തിരച്ചിൽ തുടരുന്നു

പന്തിരാങ്കാവിൽ യുവാവിനെ ഭീഷണിപ്പെടുത്തി സ്കൂട്ടറും മൊബൈൽ ഫോണും കവർന്ന കേസിൽ മൂന്ന് യുവാക്കളെ പോലീസ് അറസ്റ്റ് ചെയ്തു. പന്തിരാങ്കാവ് സ്വദേശി സനിത് (29), മണക്കടവ് സ്വദേശികളായ ജിഷ്ണു (21), മുഹമ്മദ് ഷഫീഖ് (26) എന്നിവരാണ് പിടിയിലായത്. ഒപ്പമുണ്ടായിരുന്ന അഭിഷേക് എന്ന യുവാവിനായി പോലീസ് അന്വേഷണം ഊർജിതമാക്കി.

​ഈ മാസം പത്തിന് വൈകുന്നേരം പന്തിരാങ്കാവ് മാമ്പുഴ പാലത്തിന് താഴെ വെച്ചായിരുന്നു സംഭവം. വഴിയാത്രക്കാരനായ കൈമ്പാലം സ്വദേശി മുഹമ്മദ് സൈദിനെ തടഞ്ഞുനിർത്തി ആക്രമിച്ച ശേഷം വാഹനവും ഫോണുമായി സംഘം കടന്നുകളയുകയായിരുന്നു. പന്തിരാങ്കാവ് ഇൻസ്പെക്ടർ ശ്രീകുമാറിന്റെ നേതൃത്വത്തിലുള്ള സംഘം പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിനൊടുവിലാണ് പ്രതികളെ വലയിലാക്കിയത്. പ്രതികളെ കോടതിയിൽ ഹാജരാക്കി.