എസ്ഐആർ പ്രഭാവം: സംസ്ഥാനത്ത് പോളിങ് ശതമാനത്തിൽ വൻ മാറ്റം

തിരുവനന്തപുരം: സംസ്ഥാനത്ത് സമഗ്ര വോട്ടർപട്ടിക പരിഷ്കരണത്തെ (എസ്ഐആർ) തുടർന്ന് വോട്ടർമാരുടെ എണ്ണത്തിൽ കുറവുണ്ടായ മണ്ഡലങ്ങളിൽ നിയമസഭാ തിരഞ്ഞെടുപ്പിൽ പോളിങ് ശതമാനം വൻതോതിൽ വർധിച്ചു. പട്ടികയിൽ നിന്ന് വ്യാജ വോട്ടർമാരും ഇരട്ടിപ്പുകളും ഒഴിവാക്കപ്പെട്ടതോടെയാണ് പോളിങ് ശതമാനത്തിൽ ഈ പ്രകടമായ മാറ്റം ദൃശ്യമായത്.

എസ്ഐആർ വഴി സംസ്ഥാനത്ത് ഏറ്റവും കൂടുതൽ വോട്ടുകൾ നീക്കം ചെയ്യപ്പെട്ട തിരുവനന്തപുരം മണ്ഡലത്തിലാണ് പോളിങ്ങിൽ ഏറ്റവും വലിയ വർധനയുണ്ടായത്. 46,000 വോട്ടർമാർ ഒഴിവാക്കപ്പെട്ട ഇവിടെ പോളിങ് 12% വരെ ഉയർന്നു. 42,000 വോട്ടർമാരെ നഷ്ടമായ വട്ടിയൂർക്കാവിൽ 10 ശതമാനത്തിലേറെ പോളിങ് വർധിച്ചപ്പോൾ, ശക്തമായ ത്രികോണ മത്സരം നടന്ന നേമം, കഴക്കൂട്ടം മണ്ഡലങ്ങളിൽ 9% വരെ വർധന രേഖപ്പെടുത്തി. നേമത്ത് 38,000 വോട്ടർമാരും കഴക്കൂട്ടത്ത് 32,000 വോട്ടർമാരുമാണ് പട്ടികയിൽ നിന്ന് പുറത്തായത്.

അതേസമയം, വോട്ടർമാരുടെ എണ്ണം വർധിച്ച മണ്ഡലങ്ങളിൽ സമ്മിശ്ര പ്രതികരണമാണ് ഉണ്ടായത്. സംസ്ഥാനത്ത് ഏറ്റവും കൂടുതൽ വോട്ടർമാർ (19,297) പുതുതായി ഉൾപ്പെട്ട മലപ്പുറം ജില്ലയിലെ വേങ്ങര മണ്ഡലത്തിൽ 8% പോളിങ് വർധിച്ചു. മലപ്പുറത്തെ ഭൂരിഭാഗം മണ്ഡലങ്ങളിലും 3% മുതൽ 4% വരെ പോളിങ് ഉയർന്നപ്പോൾ, കോഴിക്കോട് ജില്ലയിലെ വടകര, കുറ്റ്യാടി, നാദാപുരം, കുന്നമംഗലം, കൊടുവള്ളി മണ്ഡലങ്ങളിൽ പോളിങ് ശതമാനത്തിൽ നേരിയ കുറവുണ്ടായി. എന്നാൽ ഇതേ ജില്ലയിലെ ബേപ്പൂരിൽ പോളിങ് ഉയരുകയാണ് ചെയ്തത്.

പ്രമുഖ നേതാക്കൾ മത്സരിച്ച മണ്ഡലങ്ങളിലും വോട്ടർപട്ടിക പരിഷ്കരണം മാറ്റങ്ങൾ സൃഷ്ടിച്ചു. 6,000 വോട്ടർമാർ വർധിച്ച മുഖ്യമന്ത്രി പിണറായി വിജയന്റെ മണ്ഡലമായ ധർമടത്ത് പോളിങ് ശതമാനത്തിൽ നേരിയ ഇടിവുണ്ടായി. എന്നാൽ പ്രതിപക്ഷ നേതാവ് വി.ഡി. സതീശൻ മത്സരിച്ച പറവൂരിൽ മൂന്ന് ശതമാനത്തിലേറെ പോളിങ് കൂടി; ഇവിടെ 14,000 വോട്ടർമാരെ പട്ടികയിൽ നിന്ന് ഒഴിവാക്കിയിരുന്നു.

എസ്ഐആറിലൂടെ വോട്ടർമാർ കുറഞ്ഞ പാലാ, പുതുപ്പള്ളി, പിറവം, മൂവാറ്റുപുഴ, പൂഞ്ഞാർ മണ്ഡലങ്ങളിൽ പോളിങ് ശതമാനം 2% മുതൽ 3% വരെ വർധിച്ചു. 12,000 വോട്ടുകൾ വീതം കുറഞ്ഞ പാലായിലും പുതുപ്പള്ളിയിലും പോളിങ് വർധിച്ചപ്പോൾ, 21,000 വോട്ടർമാർ കുറഞ്ഞ ഇടുക്കിയിൽ 5% കൂടുതൽ പോളിങ് രേഖപ്പെടുത്തി. വോട്ടർപട്ടിക കൃത്യമാക്കിയതോടെ പോളിങ് ശതമാന കണക്കുകൾ കൂടുതൽ യാഥാർഥ്യബോധമുള്ളതായി മാറിയെന്നാണ് വിലയിരുത്തപ്പെടുന്നത്.