വിധിയെഴുതാൻ കേരളം പോളിംഗ് ബൂത്തിലേക്ക്; വിധിനിർണ്ണയത്തിൽ സ്ത്രീ വോട്ടർമാർ നിർണ്ണായകമാകും

ആവേശകരമായ പ്രചാരണങ്ങൾക്ക് വിരാമമിട്ട് കേരളം ഇന്ന് പോളിങ് ബൂത്തിലേക്ക് നീങ്ങുകയാണ്. സംസ്ഥാനത്തെ 140 മണ്ഡലങ്ങളിലും രാവിലെ ഏഴ് മണി മുതൽ വൈകുന്നേരം ആറ് മണി വരെയാണ് വോട്ടെടുപ്പ് നടക്കുന്നത്. കേരളത്തോടൊപ്പം അസമിലും പുതുച്ചേരിയിലും ഇന്ന് ജനവിധി രേഖപ്പെടുത്തുന്നുണ്ട്. ഭരണത്തുടർച്ച ലക്ഷ്യമിടുന്ന ഇടതുപക്ഷവും, ഭരണം തിരിച്ചുപിടിക്കാൻ ശ്രമിക്കുന്ന യുഡിഎഫും, സാന്നിധ്യം ശക്തമാക്കാൻ ബിജെപിയും വലിയ പ്രതീക്ഷയോടെയാണ് പോരാട്ടത്തിനിറങ്ങുന്നത്. മെയ് നാലിന് ഫലപ്രഖ്യാപനവും മെയ് 15-ന് പുതിയ സർക്കാരിന്റെ സത്യപ്രതിജ്ഞയും നടക്കും.

​ക്ഷേമപെൻഷനുകൾ, വികസന പദ്ധതികൾ, വയനാട് പുനരധിവാസം തുടങ്ങിയവ വോട്ടായി മാറുമെന്ന വിശ്വാസത്തിലാണ് എൽഡിഎഫ്. വയനാട് ദുരന്തബാധിതരുടെ ഫണ്ടുമായി ബന്ധപ്പെട്ട് കോൺഗ്രസിനെതിരെ ഉയർത്തിയ രാഷ്ട്രീയ ആരോപണങ്ങളും തങ്ങൾക്ക് അനുകൂലമാകുമെന്ന് അവർ പ്രതീക്ഷിക്കുന്നു. അതേസമയം, ഭരണവിരുദ്ധ വികാരം, വിലക്കയറ്റം, സാമ്പത്തിക പ്രതിസന്ധി, തൊഴിലില്ലായ്മ തുടങ്ങിയ വിഷയങ്ങൾ ഉയർത്തിക്കാട്ടിയാണ് യുഡിഎഫ് വോട്ട് തേടുന്നത്. ഇന്ദിര ഗ്യാരണ്ടി അടക്കമുള്ള വാഗ്ദാനങ്ങൾ തങ്ങളെ വിജയത്തിലെത്തിക്കുമെന്ന് കോൺഗ്രസ് നേതൃത്വം കണക്കുകൂട്ടുന്നു. നേമം, പാലക്കാട് തുടങ്ങിയ മണ്ഡലങ്ങളിൽ അക്കൗണ്ട് തുറക്കാമെന്ന ശുഭാപ്തിവിശ്വാസത്തിലാണ് ബിജെപി. വിശ്വാസ സംരക്ഷണവും വികസനവും ഉയർത്തിക്കാട്ടുമ്പോഴും അവസാന നിമിഷം ഉയർന്ന ചില ആരോപണങ്ങൾ ബിജെപിയിൽ നേരിയ ആശങ്കയുണ്ടാക്കുന്നുണ്ട്.

​ഇത്തവണത്തെ തിരഞ്ഞെടുപ്പിൽ സ്ത്രീ വോട്ടർമാരുടെ സാന്നിധ്യം ഏറ്റവും ശ്രദ്ധേയമാണ്. കേരളത്തിലെ ആകെ വോട്ടർമാരായ 2.71 കോടിയിൽ 1.39 കോടിയും സ്ത്രീകളാണ്. പുരുഷന്മാരേക്കാൾ ഏഴ് ലക്ഷത്തോളം അധികം സ്ത്രീ വോട്ടർമാരാണ് സംസ്ഥാനത്തുള്ളത്. ആകെയുള്ള 140 മണ്ഡലങ്ങളിൽ മഞ്ചേശ്വരം, മലപ്പുറം ജില്ലയിലെ ചില മണ്ഡലങ്ങൾ ഉൾപ്പെടെയുള്ള 11 ഇടങ്ങളിൽ മാത്രമാണ് പുരുഷന്മാർക്ക് ഭൂരിപക്ഷമുള്ളത്. ബാക്കി 129 മണ്ഡലങ്ങളിലും സ്ത്രീകൾക്കാണ് മുൻതൂക്കം. കൂടാതെ നൂറു വയസ്സു പിന്നിട്ട 1,555 വോട്ടർമാരും നാലര ലക്ഷത്തിലധികം കന്നി വോട്ടർമാരും ഇത്തവണ ജനാധിപത്യ പ്രക്രിയയുടെ ഭാഗമാകുന്നുണ്ട്. പുതിയ സർക്കാരിനെ തിരഞ്ഞെടുക്കാനുള്ള ആവേശത്തിൽ സംസ്ഥാനത്തുടനീളം ബൂത്തുകളിൽ വലിയ തിരക്കാണ് അനുഭവപ്പെടുന്നത്.