വന്യമൃഗങ്ങളെ ശല്യപ്പെടുത്തിയാൽ ക്രിമിനൽക്കേസ്

ഗൂഡല്ലൂർ: മസിനഗുഡിയിൽ വന്യമൃഗങ്ങളെ ശല്യപ്പെടുത്തുന്നത് ക്രിമിനൽ കുറ്റമായി പ്രഖ്യാപിച്ച് വനംവകുപ്പ്. മസിനഗുഡി-മായാർ റോഡിൽ വന്യമൃഗങ്ങളെ ശല്യപ്പെടുത്തുന്ന രീതിയിൽ വാഹനങ്ങൾ നിർത്തിയിട്ട് അവയെ ഫോട്ടോ എടുക്കുന്നത് ക്രിമിനൽ കുറ്റമാണ്.

കഴിഞ്ഞദിവസം മസിനഗുഡി ഫോറസ്റ്റ് റെയ്‌ഞ്ച് ഓഫീസിൽ വിളിച്ചുചേർത്ത യോഗത്തിലാണ് തീരുമാനം. മസിനഗുഡി വനം റെയ്ഞ്ച് ഓഫീസർ എൻ. രാജൻ അധ്യക്ഷനായി.

വിനോദസഞ്ചാരികളുമായി വരുന്ന ഡ്രൈവർമാർ മൃഗങ്ങളെ അവർ ശല്യപ്പെടുത്തുന്നില്ലെന്ന് ഉറപ്പാക്കണം. ആഹാരം നൽകുന്നതും പൊതികൾ വനത്തിനുള്ളിലേക്ക് വലിച്ചെറിയുന്നതും ഡ്രൈവർമാർ തടയണം. വനത്തിനുള്ളിൽ പുകവലിക്കുന്നതും മദ്യപിക്കുന്നതും കർശനമായി നിരോധിച്ചിട്ടുണ്ടെന്നും നിയമലംഘനം നടത്തിയാൽ ക്രിമിനൽ കേസെടുക്കുമെന്നും റെയ്ഞ്ച് ഓഫീസർ എൻ. രാജൻ പറഞ്ഞു. ഫോറസ്റ്റർ കെ. പന്ദനരാജ് യോഗത്തിൽ വിശദീകരണം നടത്തി.