ബത്തേരിയിൽ എൽ.ഡി.എഫ്. വികസനരേഖ പുറത്തിറക്കി

സുൽത്താൻബത്തേരി : സമഗ്രമേഖലകളെയും സ്പർശിക്കുന്ന വികസനരേഖ പുറത്തിറക്കി എൽ.ഡി.എഫ്. വന്യമൃഗശല്യത്തിന് ശാശ്വതപരിഹാരമായി വനാതിർത്തികളിൽ നൂറുമീറ്റർ വീതിയിൽ കുറ്റിക്കാടുകളും മരങ്ങളും നീക്കി മധ്യത്തിലൂടെ ഫെൻസിങ്, ട്രഞ്ച് പദ്ധതി. എ.ഐ. ഉപയോഗിച്ച് മൃഗങ്ങളുടെ സാന്നിധ്യമറിയാൻ സെൻസർ അലാറങ്ങൾ, കൃഷിയിടങ്ങളിൽ ശക്തമായ ലൈറ്റുകൾ, ശബ്ദസംവിധാനങ്ങൾ തുടങ്ങിയവ സ്ഥാപിക്കും. കർഷകർക്ക് തോക്ക് ലൈസൻസിനുള്ള തടസ്സങ്ങൾ ഒഴിവാക്കും. വന്യമൃഗ ആക്രമണങ്ങളിൽ യഥാർഥനഷ്ടത്തിനൊത്ത നഷ്ടപരിഹാരം ലഭ്യമാക്കും... നെൽവയൽ സംരക്ഷണത്തിനും നെൽക്കൃഷി പ്രോത്സാഹനത്തിനും പ്രത്യേകപദ്ധതികൾ. മൂല്യവർധിത ഉത്പന്നങ്ങളുടെ സംസ്‌കരണ വ്യവസായ സ്ഥാപനം, സർക്കാർ-സഹകരണ പങ്കാളിത്തത്തോടെ കാലിത്തീറ്റ ഫാക്ടറി സ്ഥാപിക്കും. തുടങ്ങിയ വാഗ്ദാനങ്ങളാണ് വികസനരേഖയിലുള്ളത്. രേഖയുടെ പ്രകാശനം ബത്തേരി പ്രസ് ക്ലബ്ബിൽ നേതാക്കളായ കെ. റഫീഖ്, കെ.ജെ. ദേവസ്യ, പി.ആർ. ജയപ്രകാശ്, ടി.ജെ. ചാക്കോച്ചൻ, ബീനാ വിജയൻ എന്നിവർചേർന്ന് പുറത്തിറക്കി.