വീട്ടിൽക്കയറി യുവതിയെയും ഭർതൃമാതാവിനെയും ആക്രമിച്ച സംഭവം: മധ്യവയസ്കനും മകനും റിമാൻഡിൽ

കോഴിക്കോട്: നരിക്കുനി പുല്ലാളൂരിൽ വീട്ടിൽ അതിക്രമിച്ചുകയറി യുവതിയെയും കുടുംബത്തെയും വധിക്കാൻ ശ്രമിച്ച കേസിൽ രണ്ടുപേർ പിടിയിലായി. കുന്ദമംഗലം സ്വദേശികളായ കൂത്താളി വീട്ടിൽ പോക്കർ (62), മകൻ അബ്ദുസ്സമദ് (33) എന്നിവരെയാണ് ചേവായൂർ പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

​കഴിഞ്ഞ മാർച്ച് മൂന്നിന് രാത്രിയായിരുന്നു കേസിനാസ്പദമായ സംഭവം നടന്നത്. മാരകായുധങ്ങളുമായി വീട്ടിലെത്തിയ പ്രതികൾ യുവതിയെയും ഭർതൃമാതാവിനെയും മർദ്ദിക്കുകയും യുവതിയുടെ മകനെ വധിക്കുമെന്ന് ഭീഷണിപ്പെടുത്തുകയും ചെയ്തതായി പരാതിയിൽ പറയുന്നു. വീടിന്റെ മുൻവാതിൽ കമ്പിവടി ഉപയോഗിച്ച് തകർത്തതായും ആരോപണമുണ്ട്. മുൻവൈരാഗ്യമാണ് ആക്രമണത്തിന് പിന്നിലെന്ന് പോലീസ് പറഞ്ഞു.

​യുവതി നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിൽ പുല്ലാളൂർ പരിസരത്തുനിന്നാണ് പ്രതികളെ കസ്റ്റഡിയിലെടുത്തത്. സബ് ഇൻസ്പെക്ടർ ബിജു, സിവിൽ പോലീസ് ഓഫീസർ ഫസൽ, ഹോം ഗാർഡ് ജയരാജൻ എന്നിവരടങ്ങിയ സംഘമാണ് ഇവരെ പിടികൂടിയത്. പരിഭ്രാന്തരായ വീട്ടുകാരെ ആക്രമിച്ച സംഭവത്തിൽ പ്രതികൾക്കെതിരെ വധശ്രമം ഉൾപ്പെടെയുള്ള വകുപ്പുകൾ ചുമത്തിയിട്ടുണ്ട്.