'വോട്ട് ചെയ്യൂ, ഒരു രൂപയ്ക്ക് പുട്ടുപൊടി സ്വന്തമാക്കൂ'; വോട്ടർമാർക്കായി സപ്ലൈക്കോയുടെ സ്പെഷ്യൽ ഓഫർ

തിരുവനന്തപുരം: വോട്ടർമാരെ പോളിങ് ബൂത്തുകളിലേക്ക് ആകർഷിക്കാൻ വേറിട്ട ക്യാമ്പയിനുമായി സപ്ലൈക്കോ രംഗത്ത്. ഏപ്രിൽ 9-ന് നടക്കുന്ന നിയമസഭാ തിരഞ്ഞെടുപ്പിൽ വോട്ട് രേഖപ്പെടുത്തുന്നവർക്ക് വെറും ഒരു രൂപയ്ക്ക് ഒരു കിലോ 'ശബരി' പുട്ടുപൊടി നൽകുന്നതാണ് പദ്ധതി. വോട്ട് ചെയ്തതിന്റെ അടയാളമായ വിരലിലെ മഷി പരിശോധിച്ച ശേഷമായിരിക്കും ഈ ആനുകൂല്യം വോട്ടർമാർക്ക് ലഭ്യമാക്കുക.

​'വോട്ടു ചെയ്യൂ, പുട്ടടിക്കൂ' എന്ന ടാഗ്‌ലൈനോടെ സിസ്റ്റമാറ്റിക് വോട്ടേഴ്‌സ് എജ്യുക്കേഷൻ ആൻഡ് ഇലക്ടറൽ പാർട്ടിസിപ്പേഷൻ (സ്വീപ്), ജില്ലാ ഭരണകൂടം, സപ്ലൈക്കോ എന്നിവ സംയുക്തമായാണ് ഈ തിരഞ്ഞെടുപ്പ് ബോധവൽക്കരണ പരിപാടി സംഘടിപ്പിക്കുന്നത്. എന്നാൽ ഈ ഓഫർ ലഭിക്കുന്നതിന് ഒരു നിബന്ധന കൂടിയുണ്ട്; സപ്ലൈക്കോ ഔട്ട്‌ലെറ്റുകളിൽ നിന്ന് ആയിരം രൂപയ്ക്ക് മുകളിൽ സബ്‌സിഡിയില്ലാത്ത സാധനങ്ങൾ വാങ്ങുന്ന ഉപഭോക്താക്കൾക്ക് മാത്രമേ ഒരു രൂപയ്ക്ക് പുട്ടുപൊടി പാക്കറ്റ് സ്വന്തമാക്കാൻ സാധിക്കൂ.

​തിരഞ്ഞെടുപ്പിന് തൊട്ടുപിന്നാലെ ഏപ്രിൽ 10, 11 തീയതികളിൽ സപ്ലൈക്കോയിൽ നിന്ന് സാധനങ്ങൾ വാങ്ങുന്നവർക്കാണ് ഈ സവിശേഷമായ ഓഫർ പ്രയോജനപ്പെടുത്താൻ കഴിയുകയെന്ന് അധികൃതർ അറിയിച്ചു. സമ്മതിദാനാവകാശം വിനിയോഗിക്കുന്നതിനെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് ഇത്തരമൊരു വേറിട്ട പദ്ധതിക്ക് സപ്ലൈക്കോ രൂപം നൽകിയിരിക്കുന്നത്.