വടകര റെയിൽവേ സ്റ്റേഷൻ റോഡിൽ മുറിച്ചിട്ട മരത്തടികൾ യാത്രക്കാർക്ക് ഭീഷണിയാകുന്നു

വടകര റെയിൽവേ സ്റ്റേഷൻ റോഡിലെ പോലീസ് വനിതാ സെല്ലിന് സമീപം മുറിച്ചിട്ട കൂറ്റൻ മരത്തിന്റെ അവശിഷ്ടങ്ങൾ നീക്കം ചെയ്യാത്തത് യാത്രക്കാർക്കും വാഹനങ്ങൾക്കും വലിയ ബുദ്ധിമുട്ടുണ്ടാക്കുന്നു. സമീപത്തെ കെട്ടിടങ്ങൾക്കും താമസക്കാർക്കും ഭീഷണിയായതിനെ തുടർന്ന് കഴിഞ്ഞ ദിവസമാണ് ഈ പാലമരം മുറിച്ചുമാറ്റിയത്. ചെറിയ ചില്ലകൾ അന്നുതന്നെ നീക്കം ചെയ്തെങ്കിലും വലിയ തടികൾ റോഡരികിൽ തന്നെ ഉപേക്ഷിച്ച നിലയിലാണ്.

തിരക്കേറിയ ഈ റോഡിൽ ലഗേജുകളുമായി പോകുന്ന റെയിൽവേ യാത്രക്കാർക്ക് വാഹനങ്ങൾ വരുമ്പോൾ മാറിനിൽക്കാൻ പോലും ഇടമില്ലാത്ത അവസ്ഥയാണിപ്പോൾ. കൂടാതെ പഴയ പോലീസ് സ്റ്റേഷൻ മതിലിനോട് ചേർന്ന് മാസങ്ങൾക്ക് മുൻപ് മുറിച്ചിട്ട മരവും ഇതുവരെ മാറ്റിയിട്ടില്ല. നിലവിൽ ഈ ഭാഗം കാടുപിടിച്ചു കിടക്കുകയാണ്. അപകടഭീഷണിയുയർത്തുന്ന ഈ മരത്തടികൾ എത്രയും വേഗം ഇവിടെനിന്ന് നീക്കം ചെയ്യണമെന്ന ആവശ്യം നാട്ടുകാർക്കിടയിൽ ശക്തമാണ്.