മരുമകളുടെ മർദ്ദനത്തിൽ വയോധികയ്ക്ക് പരിക്ക്; മൊബൈൽ ഫോൺ കൊണ്ടുള്ള ഏറിൽ തലയ്ക്ക് ആഴത്തിൽ മുറിവ്

കോഴിക്കോട്: കട്ടിപ്പാറയിൽ മരുമകളുടെ ആക്രമണത്തിൽ അമ്മായിയമ്മയ്ക്ക് ഗുരുതരമായി പരിക്കേറ്റു. ചമൽ കൊളമല സ്വദേശിനി മാധവി (71) ആണ് ആക്രമണത്തിന് ഇരയായത്. വാക്കുതർക്കത്തിനിടെ മരുമകൾ മൊബൈൽ ഫോൺ ഉപയോഗിച്ച് എറിഞ്ഞതിനെത്തുടർന്ന് മാധവിയുടെ തലയ്ക്ക് ആഴത്തിൽ മുറിവേൽക്കുകയായിരുന്നു.

​കുടുംബത്തിൽ പതിവായി തർക്കങ്ങൾ നടക്കാറുണ്ടെന്ന് നാട്ടുകാർ പറയുന്നു. പരിക്കേറ്റ മാധവിയെ മകൻ ഉടൻതന്നെ താമരശ്ശേരി താലൂക്ക് ആശുപത്രിയിൽ എത്തിച്ചെങ്കിലും പരിക്ക് ഗുരുതരമായതിനാൽ പിന്നീട് കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. സംഭവത്തിൽ നിലവിൽ ചികിത്സയിൽ കഴിയുന്ന വയോധികയുടെ ആരോഗ്യനില തൃപ്തികരമാണെന്നാണ് റിപ്പോർട്ടുകൾ.