പുസ്തക വിവാദം: എഴുത്തുകാർക്കും പ്രസാധകർക്കുമെതിരെ എം.ടിയുടെ മകൾ കോടതിയിൽ മൊഴി നൽകി

കോഴിക്കോട്: വിഖ്യാത എഴുത്തുകാരൻ എം.ടി. വാസുദേവൻ നായരെയും കുടുംബത്തെയും അപകീർത്തിപ്പെടുത്തുന്ന രീതിയിൽ പുസ്തകം പ്രസിദ്ധീകരിച്ചെന്ന പരാതിയിൽ മകൾ അശ്വതിയുടെ മൊഴി കോടതി രേഖപ്പെടുത്തി. കോഴിക്കോട് സി.ജെ.എം കോടതി (4)-ലാണ് അശ്വതി ഹാജരായി മൊഴി നൽകിയത്. വിവാദമായ പുസ്തകം പിൻവലിക്കണമെന്നും ഇതിന് പിന്നിൽ പ്രവർത്തിച്ച എഴുത്തുകാർക്കും പ്രസാധകർക്കുമെതിരെ കർശന നടപടി സ്വീകരിക്കണമെന്നും ആവശ്യപ്പെട്ട് അശ്വതി സമർപ്പിച്ച ഹർജിയിലാണ് ഈ നടപടി.

​ദീദി ദാമോദരൻ, എച്ച്‌മുക്കുട്ടി എന്നിവർ ചേർന്ന് രചിച്ച് 'ബുക്ക് വേം' പ്രസിദ്ധീകരിച്ച 'എംറ്റി സ്പേസ്: ബാഷ്‌പീകൃതയുടെ ആറാം വിരൽ' എന്ന പുസ്തകമാണ് വിവാദത്തിന് ആധാരം. പുസ്തകത്തിന്റെ തലക്കെട്ടും ഡിസൈനും എം.ടിയെ മോശക്കാരനായി ചിത്രീകരിക്കുന്നതാണെന്നും സാമ്പത്തിക ലാഭത്തിനായി നടത്തിയ ഗൂഢാലോചനയുടെ ഭാഗമാണിതെന്നുമാണ് അശ്വതി കോടതിയെ അറിയിച്ചത്. കുടുംബത്തിന്റെ അനുമതിയില്ലാതെ പ്രസിദ്ധീകരിച്ച ഈ കൃതി പിതാവിനെ തേജോവധം ചെയ്യുന്നതാണെന്ന് എം.ടിയുടെ മക്കളായ സിതാരയും അശ്വതിയും നേരത്തെ തന്നെ വ്യക്തമാക്കിയിരുന്നു.

​നേരത്തെ പുസ്തകം പിൻവലിച്ച് മാപ്പ് പറയണമെന്ന് ആവശ്യപ്പെട്ടിട്ടും നടപടിയുണ്ടാകാത്ത സാഹചര്യത്തിലാണ് കുടുംബം നിയമപോരാട്ടത്തിലേക്ക് കടന്നത്. പ്രശസ്തിക്കും പണത്തിനും വേണ്ടി എഴുത്തുകാരെയും കുടുംബത്തെയും അപമാനിക്കുന്നത് അംഗീകരിക്കാനാവില്ലെന്ന നിലപാടിലാണ് ഇവർ. കോടതി നടപടികൾക്ക് ശേഷം പുറത്തിറങ്ങിയ അശ്വതി മാധ്യമങ്ങളോട് പ്രതികരിക്കാൻ തയ്യാറായില്ല.