വടകരയിൽ കെ.കെ. രമയ്ക്ക് ചിഹ്നം മാറി; ഫുട്ബോളിന് പകരം 'ടെലിവിഷൻ' ചിഹ്നത്തിൽ മത്സരിക്കും

വടകരയിലെ ആർ.എം.പി.ഐ സ്ഥാനാർത്ഥി കെ.കെ. രമയ്ക്ക് അവസാന നിമിഷം ഫുട്ബോൾ ചിഹ്നം നഷ്ടമായി. സ്വതന്ത്ര സ്ഥാനാർത്ഥികൾക്കുള്ള പട്ടികയിൽ നിന്ന് ഫുട്ബോൾ ഒഴിവാക്കപ്പെട്ടതാണ് ഇതിന് കാരണമായത്. പകരം 'ടെലിവിഷൻ' ചിഹ്നത്തിലാണ് കെ.കെ. രമ ഇത്തവണ ജനവിധി തേടുന്നത്.

​കഴിഞ്ഞ നിയമസഭാ, തദ്ദേശ തെരഞ്ഞെടുപ്പുകളിൽ ഫുട്ബോൾ ചിഹ്നത്തിലായിരുന്നു ആർ.എം.പി.ഐ മത്സരിച്ചിരുന്നത്. ഇത്തവണയും ഇതേ ചിഹ്നത്തിൽ പ്രചാരണം സജീവമായി മുന്നേറുന്നതിനിടെയാണ് അപ്രതീക്ഷിത മാറ്റം ഉണ്ടായത്. എന്നാൽ, പുതിയ സാഹചര്യം അംഗീകരിച്ച് ടെലിവിഷൻ ചിഹ്നത്തിൽ തന്നെ മത്സരിക്കുമെന്ന് ആർ.എം.പി.ഐ സംസ്ഥാന സെക്രട്ടറി എൻ. വേണു അറിയിച്ചു. ടി.പി. ചന്ദ്രശേഖരൻ മുൻപ് മത്സരിച്ച ചിഹ്നമായിരുന്നു ടെലിവിഷൻ എന്നത് ശ്രദ്ധേയമാണ്.