ഉള്ളിയേരിയിൽ കാട്ടുപന്നിക്കൂട്ടം നേന്ത്രവാഴത്തോട്ടം നശിപ്പിച്ചു; കർഷകർക്ക് വൻ നഷ്ടം

ഉള്ളിയേരി നാറാത്ത് പാടത്തിൽ രവീന്ദ്രൻ എന്ന കർഷകന്റെ നേന്ത്രവാഴത്തോട്ടം കാട്ടുപന്നിക്കൂട്ടം നശിപ്പിച്ചു. പാലോറമലയിലെ കാടുകളിൽ താവളമടിച്ചിരിക്കുന്ന പന്നികൾ രാത്രികാലങ്ങളിൽ കൂട്ടത്തോടെയിറങ്ങിയാണ് കൃഷിനാശം വരുത്തുന്നത്. ഏകദേശം 80-ഓളം വാഴകളാണ് ഇത്തവണ പന്നികൾ നശിപ്പിച്ചത്.

​കന്നൊന്നിന് 30 രൂപ നിരക്കിൽ വാങ്ങി നട്ട വാഴകൾക്ക് രണ്ടുമാസം പ്രായമായിരുന്നു. രണ്ടുതവണ വളമിട്ട് നന്നായി വളർന്നുവരുന്നതിനിടെയാണ് കർഷകന് വലിയ നഷ്ടം സംഭവിച്ചത്. പ്രദേശത്ത് കാട്ടുപന്നികളുടെ ശല്യം പതിവാകുന്നത് കർഷകർക്ക് വലിയ പ്രതിസന്ധിയാണ് സൃഷ്ടിക്കുന്നത്.