പര്യടനം ഉർജ്ജിതമാക്കി കെ.പി. കുഞ്ഞമ്മദ് കുട്ടി; കുറ്റ്യാടിയിൽ എൽ.ഡി.എഫ് പ്രചാരണം സജീവം

കുറ്റ്യാടി: തിരഞ്ഞെടുപ്പ് പ്രചാരണത്തിന്റെ ഭാഗമായി കുറ്റ്യാടി മണ്ഡലം എൽ.ഡി.എഫ് സ്ഥാനാർത്ഥി കെ.പി. കുഞ്ഞമ്മദ് കുട്ടി കോട്ടപ്പള്ളി, മേമുണ്ട മേഖലകളിൽ വിപുലമായ പര്യടനം നടത്തി. വിവിധ സ്ഥാപനങ്ങളും വിദ്യാലയങ്ങളും സന്ദർശിച്ച സ്ഥാനാർത്ഥി വോട്ടർമാരെ നേരിൽ കണ്ട് പിന്തുണ അഭ്യർത്ഥിച്ചു.

​കോട്ടപ്പള്ളി വില്ലേജ് ഓഫീസ്, സമ്പൂർണ്ണ ന്യൂട്രിമിൽസ് ഉത്പാദന കേന്ദ്രം എന്നിവിടങ്ങളിലായിരുന്നു പര്യടനത്തിന്റെ തുടക്കം. തുടർന്ന് ചെമ്മരത്തൂർ എൽ.പി സ്കൂൾ, ഗവ. ആയുർവേദ ഡിസ്പെൻസറി, ചെമ്മരത്തൂർ വെസ്റ്റ് എൽ.പി സ്കൂൾ, എം.ഇ.എസ് കോളേജ് എന്നിവിടങ്ങളിലും സ്ഥാനാർത്ഥി സന്ദർശനം നടത്തി.

​ആയഞ്ചേരിയിൽ നടന്ന സ്വതന്ത്ര പാചക തൊഴിലാളി യൂണിയൻ കുറ്റ്യാടി, പേരാമ്പ്ര, വടകര മേഖല സമ്മേളന വേദികളിലും സ്ഥാനാർത്ഥി എത്തിച്ചേർന്നു.

എൽ.ഡി.എഫിന്റെ പ്രാദേശിക നേതാക്കളും പ്രവർത്തകരും പര്യടനത്തിലുടനീളം സ്ഥാനാർത്ഥിക്കൊപ്പമുണ്ടായിരുന്നു. മണ്ഡലത്തിന്റെ വിവിധ ഭാഗങ്ങളിൽ വരും ദിവസങ്ങളിലും സ്ഥാനാർത്ഥിയുടെ പര്യടനം തുടരും.