വിശുദ്ധ വാരത്തിലെ പരീക്ഷാ തീയതികൾക്കെതിരെ പ്രതിഷേധം; മാറ്റം വേണമെന്ന് കെ.എൽ.സി.എ

കോഴിക്കോട്: പെസഹാ വ്യാഴം, ദുഖഃശനി, ഈസ്റ്റർ ദിനങ്ങളിൽ പരീക്ഷകൾ നിശ്ചയിച്ച ദേശീയ പരീക്ഷാ ഏജൻസിയുടെ (NTA) നടപടിക്കെതിരെ വ്യാപക പ്രതിഷേധം. കെ.എൽ.സി.എ കോഴിക്കോട് രൂപതാ സമിതിയാണ് ഈ തീരുമാനത്തിനെതിരെ രംഗത്തുവന്നത്. ഏപ്രിൽ 2 (പെസഹാ വ്യാഴം), ഏപ്രിൽ 4 (ദുഖഃശനി), ഏപ്രിൽ 5 (ഈസ്റ്റർ) എന്നീ തീയതികളിൽ ജെ.ഇ.ഇ-മെയിൻ രണ്ടാംഘട്ട പരീക്ഷകൾ നടത്താനാണ് എൻ.ടി.എ നിശ്ചയിച്ചിരിക്കുന്നത്.

​വിശ്വാസികൾ ആരാധനകളിലും ആത്മീയ കർമ്മങ്ങളിലും മുഴുകുന്ന വിശുദ്ധ വാരത്തിൽ പരീക്ഷകൾ നടത്തുന്നത് ക്രൈസ്തവ സമൂഹത്തോടുള്ള അവഗണനയാണെന്ന് സമിതി ആരോപിച്ചു. മതസ്വാതന്ത്ര്യത്തെയും വിശ്വാസികളുടെ അവകാശങ്ങളെയും ചോദ്യം ചെയ്യുന്ന ഈ നടപടി തിരുത്തണമെന്നും പരീക്ഷാ തീയതികൾ അടിയന്തരമായി പുനഃക്രമീകരിക്കണമെന്നും സമിതി ആവശ്യപ്പെട്ടു. അധികൃതർ അനുകൂല നിലപാട് സ്വീകരിച്ചില്ലെങ്കിൽ ശക്തമായ സമര പരിപാടികളുമായി മുന്നോട്ട് പോകുമെന്ന് കെ.എൽ.സി.എ മുന്നറിയിപ്പ് നൽകി.