കോഴിക്കോട്ട് പക്ഷിപ്പനി സ്ഥിരീകരിച്ചു: അഞ്ച് തദ്ദേശ സ്ഥാപനങ്ങളിൽ അതീവ ജാഗ്രത

കോഴിക്കോട് ജില്ലയിലെ വിവിധ പ്രദേശങ്ങളിൽ പക്ഷിപ്പനി (ഏവിയൻ ഇൻഫ്ലുവൻസ) സ്ഥിരീകരിച്ച സാഹചര്യത്തിൽ ജില്ലാ മൃഗസംരക്ഷണ വകുപ്പ് അതീവ ജാഗ്രതാ നിർദ്ദേശങ്ങൾ പുറപ്പെടുവിച്ചു. പനങ്ങാട്, ഒളവണ്ണ, കക്കോടി, പെരുമണ്ണ എന്നീ പഞ്ചായത്തുകളിലും കോഴിക്കോട് കോർപ്പറേഷൻ പരിധിയിലെ നല്ലളത്തുമാണ് രോഗബാധ റിപ്പോർട്ട് ചെയ്തിരിക്കുന്നത്.

​പരിശോധനയ്ക്ക് അയച്ച സാമ്പിളുകളിൽ പക്ഷിപ്പനിയുടെ എച്ച്5എൻ1 (H5N1) വകഭേദമാണ് കണ്ടെത്തിയത്. രോഗം സ്ഥിരീകരിച്ച പ്രദേശങ്ങളിൽ പ്രതിരോധ നടപടികളുടെ ഭാഗമായി ദ്രുതകർമസേനയെ (RRT) വിന്യസിച്ച് പക്ഷികളെ കൊന്നൊടുക്കുന്ന നടപടികൾ ഉടൻ ആരംഭിക്കും. നിലവിൽ പക്ഷിപ്പനി മനുഷ്യരിലേക്ക് പടർന്ന സാഹചര്യം റിപ്പോർട്ട് ചെയ്തിട്ടില്ലെങ്കിലും രോഗവ്യാപനം തടയുന്നതിനായി പൊതുജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു.