അപ്രതീക്ഷിത കാറ്റും മഴയും: കർഷകർക്ക് കനത്ത ആഘാതം; പതിനായിരക്കണക്കിന് വാഴകൾ നശിച്ചു

ബുധനാഴ്ച പുലർച്ചെയുണ്ടായ അപ്രതീക്ഷിതമായ കാറ്റിലും മഴയിലും ചാത്തമംഗലം, മാവൂർ, പെരുവയൽ പഞ്ചായത്തുകളിൽ വ്യാപകമായ കൃഷിനാശം സംഭവിച്ചു. വിഷുവിപണി ലക്ഷ്യമിട്ട് കർഷകർ നട്ടുവളർത്തിയ ആയിരക്കണക്കിന് നേന്ത്രവാഴകളാണ് കനത്ത കാറ്റിൽ ഒടിഞ്ഞുവീണത്. ചാത്തമംഗലം പഞ്ചായത്തിലെ വെള്ളന്നൂർ, ഇഷ്ടികബസാർ, വിരിപ്പിൽ, കോട്ടോയിൽ താഴം സങ്കേതം തുടങ്ങിയ ഭാഗങ്ങളിൽ കൃഷിനാശം രൂക്ഷമാണ്. കാലംതെറ്റിപ്പെയ്ത ഈ മഴ കർഷകർക്ക് വലിയ സാമ്പത്തിക നഷ്ടമാണ് വരുത്തിവെച്ചിരിക്കുന്നത്.

​മാവൂർ, പെരുവയൽ പഞ്ചായത്തുകളിലായി നാലായിരത്തിലധികം വാഴകളും വലിയ തോതിൽ കപ്പകൃഷിയും നശിച്ചു. പുലർച്ചെ നാലുമണിയോടെ വീശിയടിച്ച കാറ്റിൽ പെരുവയൽ പഞ്ചായത്തിലെ ചെട്ടിക്കടവ് ഭാഗത്താണ് കൂടുതൽ നാശനഷ്ടങ്ങളുണ്ടായത്. ഇവിടെ കൊടമ്പാട്ട് മണ്ണിൽ മോഹനന്റെ 1300-ഓളം വാഴകളും തറയിൽ ഗണേശന്റെ 400-ഓളം വാഴകളും പൂർണ്ണമായും നശിച്ചു. കാർഷിക മേഖലയ്ക്ക് പുറമെ പലയിടങ്ങളിലും മരങ്ങൾ കടപുഴകി വീണതിനെത്തുടർന്ന് വൈദ്യുതി ബന്ധവും തടസ്സപ്പെട്ടിട്ടുണ്ട്.