മുക്കത്ത് സ്വകാര്യ ബസുകളുടെ മത്സരയോട്ടം; യാത്രക്കാരുമായി പോയ ബസിനെ ഇടിച്ചുതെറിപ്പിച്ചു

മുക്കത്ത് സ്വകാര്യ ബസുകൾ തമ്മിലുള്ള മത്സരയോട്ടം യാത്രക്കാരുടെ ജീവന് ഭീഷണിയാകുന്നു. കഴിഞ്ഞ ദിവസം അഗസ്ത്യൻമുഴിയിൽ സമയക്രമത്തെച്ചൊല്ലിയുള്ള തർക്കത്തിനിടെ, മുന്നിൽ പോവുകയായിരുന്ന ബസിനെ മറ്റൊരു സ്വകാര്യ ബസ് മനഃപൂർവ്വം ഇടിച്ചുതെറിപ്പിച്ച ശേഷം നിർത്താതെ പോയി. കോഴിക്കോട്-നിലമ്പൂർ റൂട്ടിലോടുന്ന 'ബുറാഖ്' എന്ന ബസിനെ പിന്നാലെ വന്ന 'പി.ടി.സി' എന്ന ബസാണ് ഇടിച്ചത്.

​എടവണ്ണ-കൊയിലാണ്ടി സംസ്ഥാനപാതയിൽ അഗസ്ത്യൻമുഴി മിനി സിവിൽ സ്റ്റേഷന് സമീപം തിങ്കളാഴ്ച രാവിലെ പതിനൊന്നരയോടെയാണ് ഈ നടുക്കുന്ന സംഭവം ഉണ്ടായത്. പുറകിൽ വന്ന ബസ് അമിതവേഗത്തിൽ മറികടക്കാൻ ശ്രമിക്കുന്നതിനിടെ മുന്നിലെ ബസിനെ ഇടിക്കുകയായിരുന്നുവെന്ന് ദൃക്‌സാക്ഷികൾ പറയുന്നു. അപകടത്തിന്റെ സി.സി.ടി.വി. ദൃശ്യങ്ങൾ പുറത്തുവന്നിട്ടുണ്ട്.

​ഇടിയുടെ ആഘാതത്തിൽ ബുറാഖ് ബസിന്റെ ബോഡിക്കും സൈഡ് ഗ്ലാസിനും കാര്യമായ കേടുപാടുകൾ സംഭവിച്ചു. ബസിനുള്ളിലുണ്ടായിരുന്ന മുതിർന്ന പൗരന്മാരടക്കമുള്ള യാത്രക്കാർ നിലത്തു വീഴുകയും പരിക്കേൽക്കാതെ തലനാരിഴയ്ക്ക് രക്ഷപ്പെടുകയുമായിരുന്നു. സംഭവത്തിന് പിന്നാലെ പി.ടി.സി ബസ് കസ്റ്റഡിയിലെടുക്കുമെന്ന് മുക്കം പോലീസ് അറിയിച്ചിട്ടുണ്ട്.