കവടിയാർ കൊട്ടാരത്തിൽ വൻ കവർച്ച; രണ്ട് കോടിയുടെ സ്വർണാഭരണങ്ങൾ മോഷണം പോയി

തിരുവനന്തപുരം: ചരിത്രപ്രസിദ്ധമായ കവടിയാർ കൊട്ടാരത്തിൽ കോടികൾ വിലമതിക്കുന്ന സ്വർണാഭരണങ്ങൾ മോഷണം പോയി. കൊട്ടാരത്തിലെ ഇരുമ്പ് അലമാരയിൽ സൂക്ഷിച്ചിരുന്ന ഏകദേശം രണ്ട് കോടി രൂപയുടെ സ്വത്താണ് നഷ്ടപ്പെട്ടത്. സംഭവത്തിൽ അശ്വതി തിരുനാൾ ഗൗരി ലക്ഷ്മി ഭായ് പൊലീസിൽ പരാതി നൽകി.

അത്യപൂർവ്വമായ രത്നങ്ങൾ പതിച്ച സ്വർണാഭരണങ്ങളും പത്മനാഭസ്വാമിയുടെ ചിത്രം കൊത്തിയ പുരാതന ആഭരണങ്ങളുമാണ് കവർച്ച ചെയ്യപ്പെട്ടത്. ഇതിനുപുറമെ വിദേശത്തുനിന്ന് എത്തിച്ച വിശിഷ്ടമായ ആഭരണശേഖരവും നഷ്ടപ്പെട്ടവയിൽ ഉൾപ്പെടുന്നു. കഴിഞ്ഞ വർഷം അവസാനത്തോടെയാണ് മോഷണം നടന്നതെന്നാണ് പ്രാഥമിക വിവരം.

പരാതി ലഭിച്ചതിനെത്തുടർന്ന് കഴിഞ്ഞ നാല് മാസമായി പൊലീസ് അതീവ രഹസ്യമായി അന്വേഷണം നടത്തിവരികയായിരുന്നു. എന്നാൽ മോഷണം പോയ വസ്തുക്കളെക്കുറിച്ച് ഇതുവരെ സൂചനകളൊന്നും ലഭിക്കാത്തതിനെത്തുടർന്നാണ് വിവരം ഇപ്പോൾ പുറത്തുവരുന്നത്. സംഭവത്തിൽ പോലീസ് എഫ്.ഐ.ആർ രജിസ്റ്റർ ചെയ്ത് വിപുലമായ അന്വേഷണം ആരംഭിച്ചിട്ടുണ്ട്. കൊട്ടാരത്തിലെ സുരക്ഷാ സംവിധാനങ്ങളും ജീവനക്കാരെയും കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.