കെഎസ്ആർടിസിക്ക് 10 കോടി അധിക സഹായം; രണ്ട് ഗഡു ഡിഎ/ഡിആർ അനുവദിച്ചു

തിരുവനന്തപുരം: കെഎസ്ആർടിസി ജീവനക്കാർക്കും പെൻഷൻകാർക്കും ആശ്വാസമായി രണ്ട് ഗഡു ഡിഎ (ക്ഷാമബത്ത), ഡിആർ (ക്ഷാമാശ്വാസം) എന്നിവ അനുവദിച്ചു. ഏഴ് ശതമാനം വർധനയോടെയാണ് ഈ ആനുകൂല്യം ലഭ്യമാകുക. ഇതിനായി പത്ത് കോടി രൂപ അധിക സഹായമായി കോർപ്പറേഷന് നൽകിയതായി ധനമന്ത്രി കെ.എൻ. ബാലഗോപാൽ അറിയിച്ചു.

​2022 ജനുവരി മുതൽ പ്രാബല്യത്തിൽ വന്ന ശമ്പള പരിഷ്കരണത്തിന്റെ തുടർച്ചയായാണ് ഈ ആനുകൂല്യം അനുവദിച്ചിരിക്കുന്നത്. നടപ്പ് സാമ്പത്തിക വർഷം ഇതുവരെ 1,574 കോടി രൂപയാണ് സർക്കാർ കെഎസ്ആർടിസിക്ക് സഹായമായി നൽകിയത്. ഇതിൽ 1,439 കോടി രൂപ പ്രത്യേക സഹായമായും 135 കോടി രൂപ പുതിയ ബസുകൾ വാങ്ങുന്നതടക്കമുള്ള മൂലധന ആവശ്യങ്ങൾക്കായുമാണ് വകയിരുത്തിയത്. സർക്കാരിന്റെ ഈ ഇടപെടൽ പ്രതിസന്ധിയിലായ കോർപ്പറേഷന് വലിയ ആശ്വാസമാകും.