കോഴിക്കോട് ബീച്ച് ആശുപത്രിയിലെ അമ്മത്തൊട്ടിലിൽ നാലാമത്തെ അതിഥി; ആൺകുഞ്ഞിന് 'ആരവ്' എന്ന് പേരിട്ടു

കോഴിക്കോട്: കോഴിക്കോട് ബീച്ച് ആശുപത്രിയോട് ചേർന്നുള്ള അമ്മത്തൊട്ടിലിൽ ഏഴ് ദിവസം പ്രായമുള്ള ആൺകുഞ്ഞിനെ ലഭിച്ചു. വ്യാഴാഴ്ച രാത്രി 10.37-നാണ് കുഞ്ഞെത്തിയത്. കുട്ടിയെ സ്വീകരിച്ചാലുടൻ മുഴങ്ങുന്ന അലാറം കേട്ട് എത്തിയ നഴ്സിംഗ് ജീവനക്കാർ കുഞ്ഞിനെ ഇന്റൻസീവ് കെയർ യൂണിറ്റിൽ പ്രവേശിപ്പിച്ചു. 3.5 കിലോ ഗ്രാം തൂക്കമുള്ള കുഞ്ഞ് പൂർണ്ണ ആരോഗ്യവാനാണെന്ന് ആശുപത്രി അധികൃതർ അറിയിച്ചു.

​സമാധാനം എന്ന് അർത്ഥം വരുന്ന 'ആരവ്' എന്നാണ് കുഞ്ഞിന് പേരിട്ടിരിക്കുന്നതെന്ന് സംസ്ഥാന ശിശുക്ഷേമ സമിതി ജനറൽ സെക്രട്ടറി അഡ്വ. ജി.എൽ. അരുൺ ഗോപി അറിയിച്ചു. കഴിഞ്ഞ ഓഗസ്റ്റിൽ പ്രവർത്തനം ആരംഭിച്ച ഈ അമ്മത്തൊട്ടിലിൽ ലഭിക്കുന്ന നാലാമത്തെ കുഞ്ഞാണിത്. ഇതിനുമുമ്പ് ലഭിച്ച കുട്ടികൾക്ക് ആദി, ഹെർത്യൂസ്, നിലാവ് എന്നിങ്ങനെയാണ് പേര് നൽകിയിരുന്നത്. നിലവിൽ കുഞ്ഞ് ബീച്ച് ആശുപത്രിയുടെ സംരക്ഷണയിലാണ്.