മംഗലാപുരം-രാമേശ്വരം ട്രെയിൻ: മലബാറിൽ അഞ്ചിടത്ത് സ്റ്റോപ്പ്; സമയക്രമം അറിയാം

മംഗലാപുരം-രാമേശ്വരം റെയിൽവേ പാതയിൽ പുതിയ ട്രെയിൻ സർവീസിന്റെ സമയക്രമവും സ്റ്റോപ്പുകളും സംബന്ധിച്ച ഔദ്യോഗിക വിജ്ഞാപനം പുറത്തിറങ്ങി. പ്രധാനമന്ത്രി നരേന്ദ്ര മോദി ഇന്ന് ഫ്ലാഗ് ഓഫ് ചെയ്ത ഈ പുതിയ സർവീസിന് മലബാറിലെ മിക്ക പ്രധാന സ്റ്റേഷനുകളിലും സ്റ്റോപ്പ് അനുവദിച്ചിട്ടുണ്ട്. തുടക്കത്തിൽ പാലക്കാട് മാത്രമായിരിക്കും കേരളത്തിലെ ഏക സ്റ്റോപ്പ് എന്ന തരത്തിൽ പ്രചാരണങ്ങൾ ഉണ്ടായിരുന്നെങ്കിലും, യാത്രക്കാരുടെ ആവശ്യം പരിഗണിച്ച് പ്രധാന നഗരങ്ങളിലെല്ലാം സ്റ്റോപ്പുകൾ ഉറപ്പാക്കുകയായിരുന്നു.

​മംഗലാപുരത്തുനിന്ന് എല്ലാ ശനിയാഴ്ചയും രാത്രി 7.30-നാണ് ട്രെയിൻ യാത്ര ആരംഭിക്കുന്നത്. കേരളത്തിലൂടെയുള്ള യാത്രയിൽ രാത്രി 8.09-ന് കാസർഗോഡും 9.17-ന് കണ്ണൂരും എത്തുന്ന ട്രെയിൻ 10.37-ഓടെ കോഴിക്കോട് എത്തും. തുടർന്ന് രാത്രി 11.12-ന് തിരൂരും അർധരാത്രി 00.10-ന് ഷൊർണൂരും പിന്നിട്ട് പുലർച്ചെ 1.30-ന് പാലക്കാട് എത്തുന്ന രീതിയിലാണ് സമയക്രമം നിശ്ചയിച്ചിട്ടുള്ളത്. ഞായറാഴ്ച രാവിലെ 10.50-ന് ട്രെയിൻ രാമേശ്വരത്ത് യാത്ര അവസാനിപ്പിക്കും.

​മടക്കയാത്ര ഞായറാഴ്ച ഉച്ചയ്ക്ക് 3.30-ന് രാമേശ്വരത്തുനിന്ന് ആരംഭിക്കും. അന്നേദിവസം രാത്രി 10.50-ന് പാലക്കാട് എത്തുന്ന ട്രെയിൻ തിങ്കളാഴ്ച പുലർച്ചെ 00.12-ന് ഷൊർണൂർ, 00.55-ന് തിരൂർ, 1.47-ന് കോഴിക്കോട് എന്നിവിടങ്ങളിലെത്തും. തുടർന്ന് പുലർച്ചെ 3.17-ന് കണ്ണൂരും 4.39-ന് കാസർഗോഡും എത്തുന്ന ട്രെയിൻ രാവിലെ 6.55-ഓടെ മംഗലാപുരത്ത് മടങ്ങിയെത്തും. ഈ പുതിയ സർവീസ് മലബാറിലെ തീർത്ഥാടകർക്കും വിനോദസഞ്ചാരികൾക്കും ഒരുപോലെ ഗുണകരമാകും.