മലയോരത്തിന് പുതുജീവൻ: പുല്ലൂരാംപാറ കാളിയാമ്പുഴയിൽ ആധുനിക പാലം ഒരുങ്ങുന്നു

തിരുവമ്പാടി നാടിനെ നടുക്കിയ കെ.എസ്.ആർ.ടി.സി. ബസ് ദുരന്തത്തിന്റെ നൊമ്പരപ്പെടുത്തുന്ന ഓർമ്മകൾക്കിടയിൽ പുല്ലൂരാംപാറ കാളിയാമ്പുഴയിൽ പുതിയ പാലം യാഥാർത്ഥ്യമാകുന്നു. നിലവിൽ പാലത്തിന്റെ പ്രധാന കോൺക്രീറ്റ് പ്രവൃത്തികൾ ആരംഭിച്ചുകഴിഞ്ഞു. മലയോര കുടിയേറ്റ മേഖലയിലെ ഏറ്റവും തിരക്കേറിയ പാതകളിലൊന്നായ തിരുവമ്പാടി-പുല്ലൂരാംപാറ റോഡിൽ 2024 ഒക്ടോബർ എട്ടിനാണ് നാടിനെ നടുക്കിയ അപകടമുണ്ടായത്. നിയന്ത്രണം വിട്ട ബസ് കാലപ്പഴക്കം ചെന്ന പാലത്തിന്റെ കൈവരി തകർത്ത് പുഴയിലേക്ക് മറിഞ്ഞ അന്ന് രണ്ട് സ്ത്രീകൾ മരിക്കുകയും 35 യാത്രക്കാർക്ക് പരിക്കേൽക്കുകയും ചെയ്തിരുന്നു. ഈ അപകടത്തിന് ശേഷമാണ് ഇവിടുത്തെ സുരക്ഷാ സംവിധാനങ്ങളെക്കുറിച്ച് വലിയ ചർച്ചകൾ ഉയർന്നത്.

​തിരുവമ്പാടി-പുല്ലൂരാംപാറ-എടത്തറ-മറിപ്പുഴ റോഡ് നവീകരണ പദ്ധതിയുടെ ഭാഗമായാണ് പഴയ പാലത്തിന് പകരം പുതിയത് നിർമ്മിക്കുന്നത്. 108.314 കോടി രൂപ അടങ്കൽ തുകയുള്ള ഈ വിപുലമായ പദ്ധതിയിൽ 10 മീറ്റർ വീതിയിൽ ആധുനിക സൗകര്യങ്ങളോടെയാണ് പാലവും അനുബന്ധ റോഡും ഒരുങ്ങുന്നത്. ഊരാളുങ്കൽ ലേബർ കോൺട്രാക്ട് സൊസൈറ്റിയാണ് ഇതിന്റെ നിർമ്മാണ കരാർ ഏറ്റെടുത്തിരിക്കുന്നത്. ഭാവിയിൽ വരാനിരിക്കുന്ന ആനക്കാംപൊയിൽ-കള്ളാടി-മേപ്പാടി തുരങ്കപാതയിലേക്കുള്ള സമീപന റോഡാണിത് എന്നതിനാൽ ഈ പാലത്തിന് വലിയ പ്രാധാന്യമാണുള്ളത്. നിർമ്മാണം അതിവേഗം പൂർത്തിയാക്കി എത്രയും പെട്ടെന്ന് ഗതാഗതത്തിന് തുറന്നുകൊടുക്കാനുള്ള ശ്രമത്തിലാണ് അധികൃതർ.