രാഷ്ട്രീയ സ്തൂപ കലശങ്ങളെച്ചൊല്ലി സി.പി.എം.-ബി.ജെ.പി. സംഘർഷം

മുഴപ്പിലങ്ങാട് : കുറുംബ ഭഗവതിക്ഷേത്രത്തിലെ താലപ്പൊലി ഉത്സവത്തിനിടെ സി.പി.എം-ബി.ജെ.പി. പ്രവർത്തകർ തമ്മിൽ സംഘർഷമുണ്ടായി. രാഷ്ട്രീയ സ്തൂപത്തെ ചൊല്ലിയാണ് സംഘർഷമുണ്ടായത്.

കല്ലേറും പെരിപ്പേറുമുണ്ടായി. ഇതേത്തുടർന്ന് പോലീസ് ലാത്തിവീശി. കല്ലേറിലും ലാത്തിവീശലിലും നിരവധിപേർക്ക് പരിക്കേറ്റു. പോലീസുകാർക്കും പരിക്കുപറ്റി.

ഉത്സവ സമാപനദിവസമായ ചൊവ്വാഴ്ച പുലർച്ചെ മൂന്ന് മണിയോടെയാണ് ദേശീയപാതയോരത്തെ ക്ഷേത്രക്കവാടത്തിന് സമീപം സംഘർഷമുണ്ടായത്.

നൂറുകണക്കിനാളുകൾ തിങ്ങിക്കൂടി നിൽക്കുമ്പോഴായിരുന്നു കല്ലേറുണ്ടായത്.

50-ഓളം പേർക്കെതിരേ കേസ്

: മുഴപ്പിലങ്ങാട് കൂറുംബ ഭഗവതി ക്ഷേത്രത്തിൽ കലശംവരവിനിടെ ഉണ്ടായ സംഘർഷവുമായി ബന്ധപ്പെട്ട് 50 പേർക്കെതിരേ കേസെടുത്തതായി എടക്കാട് പോലീസ് അറിയിച്ചു.

സി.പി.എം., ബി.ജെ.പി. പ്രവർത്തകർക്കെതിരേയാണ് കേസ്. അഞ്ച് ഡി.ജെ. വാഹനങ്ങൾക്കെതിരേയും കേസെടുത്തിട്ടുണ്ട്.