കോഴിക്കോട് നിയന്ത്രണം വിട്ട കാർ ഇരുചക്രവാഹനങ്ങളിലിടിച്ചു; രണ്ടുപേർക്ക് ഗുരുതര പരിക്ക്

കോഴിക്കോട്: നഗരത്തിലെ സ്റ്റേഡിയം ജങ്ഷൻ-പുതിയറ റോഡിൽ വെള്ളിയാഴ്ച രാത്രിയുണ്ടായ വാഹനാപകടത്തിൽ രണ്ടുപേർക്ക് ഗുരുതരമായി പരിക്കേറ്റു. ഫെഡറൽ ബാങ്കിന് സമീപം രാത്രി 11 മണിയോടെയാണ് അപകടം നടന്നത്.

​സ്റ്റേഡിയം ഭാഗത്തുനിന്ന് അമിതവേഗതയിൽ വന്ന കാർ ആദ്യം റോഡരികിൽ നിർത്തിയിട്ടിരുന്ന സ്കൂട്ടറിലും തുടർന്ന് എതിർദിശയിൽ നിന്ന് വന്ന ബൈക്കിലും ഇടിക്കുകയായിരുന്നു. ബൈക്ക് യാത്രക്കാരായ രണ്ടുപേർക്കാണ് അപകടത്തിൽ സാരമായ പരിക്കേറ്റത്. ഇവരെ ഉടൻ തന്നെ ആശുപത്രിയിലേക്ക് മാറ്റി.

​ഇരുചക്രവാഹനങ്ങളെ ഇടിച്ചുതെറിപ്പിച്ച ശേഷം നൂറുമീറ്ററോളം ദൂരം മുന്നോട്ട് പോയ ശേഷമാണ് കാർ നിന്നതെന്ന് ദൃക്‌സാക്ഷികൾ പറഞ്ഞു. അപകടത്തിന്റെ ആഘാതത്തിൽ കാറിന്റെ മുൻവശം പൂർണ്ണമായും തകർന്നിട്ടുണ്ട്.