ഡി.വൈ.എഫ്.ഐ. പ്രതിഷേധം: 'കേരള സ്റ്റോറി-2' പ്രദർശിപ്പിക്കാനായില്ല

മാനന്തവാടി: 'ദ കേരള സ്റ്റോറി 2 ഗോസ് ബിയോണ്ട് ചിത്രത്തിന്റെ പ്രദർശനം തടഞ്ഞ് ഡി.വൈ.എഫ്.ഐ. മാനന്തവാടിയിലെ വർണ തിയേറ്ററിലായിരുന്നു ഡി.വൈ.എഫ്.ഐ.യുടെ പ്രതിഷേധം. വൈകീട്ട് 5.30-നും രാത്രി 8.30-നും സിനിമ പ്രദർശിപ്പിക്കാനായിരുന്നു തിയേറ്റർ അധികൃതർ തീരുമാനിച്ചിരുന്നത്.

വൈകീട്ടത്തെ ഷോ തുടങ്ങുന്നതിനു മുൻപുതന്നെ ഡി.വൈ.എഫ്.ഐ. മാനന്തവാടി ബ്ലോക്ക് കമ്മിറ്റിയുടെ നേതൃത്വത്തിൽ പ്രവർത്തകർ തിയേറ്ററിനു മുന്നിൽ കുത്തിയിരുന്നു പ്രതിഷേധിച്ചു. ഇതുമൂലം സിനിമയുടെ പ്രദർശനം മുടങ്ങി. പോസ്റ്ററുകൾ കീറിക്കളഞ്ഞ പ്രവർത്തകർ ഇത് തീയിട്ട് നശിപ്പിച്ചു. സിനിമ പ്രദർശിപ്പിക്കാനുള്ള നീക്കത്തിൽനിന്ന് തിയേറ്റർ അധികൃതർ പിന്മാറിയില്ലെങ്കിൽ പ്രതിഷേധവുമായി ഡി.വൈ.എഫ്.ഐ. ഉണ്ടാകുമെന്ന് മുന്നറിയിപ്പ് നൽകി.

പ്രതിഷേധം ഡി.വൈ.എഫ്.ഐ. ജില്ലാ പ്രസിഡൻ്റ് കെ.ആർ. ജിതിൻ ഉദ്ഘാടനം ചെയ്‌തു. മാനന്തവാടി ബ്ലോക്ക് പ്രസിഡന്റ് കെ. അഖിൽ അധ്യക്ഷത വഹിച്ചു.

ബ്ലോക്ക് സെക്രട്ടറി വി.ബി. ബബീഷ്, ജില്ലാ കമ്മിറ്റിയംഗം നിരഞ്ജന അയകുമാർ, കെ. ഹരീഷ്, വി.ബി. അഖിൽ, ശ്രീജിത്ത് കാട്ടിക്കുളം, അർജുൻ വെൺമണി തുടങ്ങിയവർ നേതൃത്വം നൽകി.

സംഘർഷ സാധ്യത പരിഗണിച്ച് മാനന്തവാടി പ്രിൻസിപ്പൽ എസ്.ഐ.എം.സി. പവനൻ, എസ്.ഐ.മാരായ സി.എം. ഷിബു, കെ.എൻ. സുനിൽ കുമാർ എന്നിവരുടെ നേതൃത്വത്തിലുള്ള പോലീസും സ്ഥലത്തെത്തിയിരുന്നു.