വടകരയിൽ കെഎസ്‌യു നേതാവിന്റെ വീടിന് നേരെ ബോംബേറ്; സിസിടിവി ദൃശ്യങ്ങൾ പൊലീസിന്

വടകര: ആരോഗ്യമന്ത്രി വീണാ ജോർജിനെ കരിങ്കൊടി കാണിച്ച കെഎസ്‍യു ജില്ലാ സെക്രട്ടറി ബിഥുൽ ബാലന്റെ വടകരയിലെ വീടിന് നേരെ ബോംബേറുണ്ടായി. ഇന്ന് പുലർച്ചെ മൂന്ന് മണിയോടെയാണ് സംഭവം നടന്നത്. വീട്ടുകാർ ഉറങ്ങിക്കിടക്കുന്ന സമയത്തുണ്ടായ ഈ ആക്രമണം വധിക്കുക എന്ന ലക്ഷ്യത്തോടെയുള്ളതാണെന്നും പ്രദേശത്ത് കലാപമുണ്ടാക്കാനാണ് ഇതിലൂടെ ശ്രമിക്കുന്നതെന്നും ആരോപണമുയർന്നിട്ടുണ്ട്. ആക്രമണം നടത്തുന്നതിന്റെ സിസിടിവി ദൃശ്യങ്ങൾ ബിഥുൽ ബാലന്റെ കുടുംബം പൊലീസിന് കൈമാറി.

​അതേസമയം, മന്ത്രിക്ക് പരിക്കേറ്റ സംഭവവുമായി ബന്ധപ്പെട്ട് റിമാൻഡിൽ കഴിയുന്ന കെഎസ്‌യു പ്രവർത്തകർ ജാമ്യം തേടി ഇന്ന് കോടതിയെ സമീപിക്കും. കണ്ണൂർ ഫസ്റ്റ് ക്ലാസ് മജിസ്‌ട്രേറ്റ് കോടതിയിലാണ് ജാമ്യാപേക്ഷ സമർപ്പിക്കുക. രാഷ്ട്രീയ വൈരാഗ്യമാണ് ആക്രമണത്തിന് പിന്നിലെന്നാരോപിച്ച് കോൺഗ്രസ് രംഗത്തെത്തിയിട്ടുണ്ട്.