ലൈഫ് മിഷന്‍: കോഴിക്കോട് ജില്ലയില്‍ പൂര്‍ത്തീകരിച്ചത് 36,831 വീടുകള്‍

കോഴിക്കോട് ജില്ലയിൽ ലൈഫ് സമ്പൂർണ്ണ പാർപ്പിട പദ്ധതിയിലൂടെ ഇതുവരെ 36,831 വീടുകൾ പൂർത്തീകരിച്ചതായി റിപ്പോർട്ട്. 2016-ൽ ആരംഭിച്ച പദ്ധതിയുടെ വിവിധ ഘട്ടങ്ങളിലൂടെയാണ് ഇത്രയും കുടുംബങ്ങൾക്ക് സുരക്ഷിതമായ തലചായ്ക്കാൻ ഇടമൊരുങ്ങിയത്. ഇതിൽ ആദ്യഘട്ടത്തിൽ മുടങ്ങിപ്പോയ 6,484 വീടുകളുടെ നിർമ്മാണം പൂർത്തിയാക്കി. രണ്ടാം ഘട്ടത്തിൽ ഭൂമിയുള്ള 5,150 പേർക്കും മൂന്നാം ഘട്ടത്തിൽ ഭൂരഹിതരായ 714 പേർക്കും വീടും ഭൂമിയും നൽകി.

​പട്ടികജാതി, പട്ടികവർഗ്ഗ, ഫിഷറീസ് വകുപ്പുകൾ വഴി 2,192 വീടുകളും പ്രത്യേക ഗുണഭോക്തൃ പട്ടിക പ്രകാരം 2,276 വീടുകളും ജില്ലയിൽ നിർമ്മിച്ചിട്ടുണ്ട്. 2022-ൽ പ്രസിദ്ധീകരിച്ച അന്തിമ പട്ടിക പ്രകാരം ഗ്രാമപഞ്ചായത്തുകളിൽ 7,945 വീടുകളും നഗരസഭകളിൽ ലൈഫ്-പി.എം.എ.വൈ പദ്ധതി വഴി 8,930 വീടുകളും പൂർത്തിയായി. പി.എം.എ.വൈ ഗ്രാമീൺ വിഭാഗത്തിലൂടെ 2,384 വീടുകളാണ് ഒരുക്കിയത്. അതിദാരിദ്ര്യ നിർമ്മാർജന പദ്ധതിയുടെ ഭാഗമായി 756 പേർക്കും വീട് നൽകാൻ സാധിച്ചു.

​ഭൂരഹിതർക്കായി ഭൂമി കണ്ടെത്താൻ ലക്ഷ്യമിട്ടുള്ള 'മനസ്സോടിത്തിരി മണ്ണ്' ക്യാമ്പയിനിലൂടെ 100.75 സെന്റ് ഭൂമി ജില്ലയിൽ ലഭ്യമായിട്ടുണ്ട്. കൂടാതെ ചാത്തമംഗലം പഞ്ചായത്തിലെ പൂളക്കോട് നിർമ്മാണം പുരോഗമിക്കുന്ന ലൈഫ് ഭവന സമുച്ചയത്തിലൂടെ 44 കുടുംബങ്ങൾക്ക് കൂടി ഉടൻ പുനരധിവാസം ഉറപ്പാക്കാൻ സാധിക്കുമെന്നാണ് പ്രതീക്ഷിക്കുന്നത്.