കനോലി കനാൽ വികസനത്തിന് 73 കോടി; വലിയപാലം ഉദ്ഘാടനം ചെയ്ത് മന്ത്രിയുടെ പ്രഖ്യാപനം

കോഴിക്കോട് നഗരത്തിലെ ഗതാഗതക്കുരുക്കിന് പരിഹാരമായി പുതിയപാലത്ത് നിർമിച്ച വലിയ പാലത്തിന്റെ ഉദ്ഘാടനം പൊതുമരാമത്ത്-ടൂറിസം വകുപ്പ് മന്ത്രി പി.എ. മുഹമ്മദ് റിയാസ് നിർവഹിച്ചു. പുതിയപാലം യാഥാർഥ്യമായതുപോലെ തന്നെ കനോലി കനാലിനെ പാരീസ് മാതൃകയിൽ നവീകരിക്കുന്ന 'കനാൽ സിറ്റി' പദ്ധതിയും നഗരത്തിൽ നടപ്പിലാക്കുമെന്ന് മന്ത്രി പ്രഖ്യാപിച്ചു. കനോലി കനാലിലൂടെയുള്ള ബോട്ട് സർവീസ്, ചരക്കുഗതാഗതം, ടൂറിസം എന്നിവ ലക്ഷ്യമിടുന്ന ഈ പദ്ധതിയുടെ ഒന്നാം ഘട്ടത്തിനായി 73.21 കോടി രൂപ സർക്കാർ അനുവദിച്ചിട്ടുണ്ട്. അഞ്ചു വർഷത്തിനിടെ സംസ്ഥാനത്ത് 150-ലധികം പാലങ്ങൾ പൂർത്തീകരിക്കാൻ കഴിഞ്ഞതായും കോഴിക്കോടിനെ വികസിത നഗരമാക്കി മാറ്റുന്ന പ്രവർത്തനങ്ങളാണ് നടക്കുന്നതെന്നും മന്ത്രി കൂട്ടിച്ചേർത്തു.

​അഹമ്മദ് ദേവർകോവിൽ എം.എൽ.എ അധ്യക്ഷത വഹിച്ച ചടങ്ങിൽ പാലത്തിന്റെ നിർമാണം പൂർത്തിയാക്കിയ കരാറുകാർക്കും നിർമാണ റിപ്പോർട്ടുകൾ ജനങ്ങളിലെത്തിച്ച മാധ്യമങ്ങൾക്കും ഉപഹാരങ്ങൾ സമർപ്പിച്ചു. കല്ലുത്താൻകടവ്-മൂര്യാട് റോഡിനെയും മാങ്കാവ്-അരയിടത്തുപാലം ബൈപ്പാസ് റോഡിനെയും ബന്ധിപ്പിക്കുന്ന ഈ പാലം നഗര വികസനത്തിൽ നിർണായകമാണ്. ചടങ്ങിൽ കോഴിക്കോട് മേയർ ഒ. സദാശിവൻ, ഡെപ്യൂട്ടി മേയർ ഡോ. എസ്. ജയശ്രീ, മനുഷ്യാവകാശ കമ്മിഷൻ അംഗം കെ. ബൈജുനാഥ് എന്നിവർക്കൊപ്പം വിവിധ രാഷ്ട്രീയ കക്ഷി നേതാക്കളും ഉദ്യോഗസ്ഥരും പങ്കെടുത്തു.