വിവരാവകാശ നിയമപ്രകാരം വിവരങ്ങൾ നൽകാത്തത് മൗലികാവകാശ ലംഘനം -ടി.കെ. രാമകൃഷ്ണ‌ൻ

കാസർകോട്: വിവരാവകാശനിയമപ്രകാരം വിവരങ്ങൾ നിഷേധിക്കുന്നത് മൗലികാവകാശ ലംഘനമാണെന്നു സംസ്ഥാന വിവരാവകാശ കമ്മിഷണർ ടി.കെ. രാമകൃഷ്ണൻ പറഞ്ഞു. ജില്ലാ പബ്ലിക് റിലേഷൻസ് ഓഫീസിലെ പി.ആർ. ചേംബറിൽ നടത്തിയ അദാലത്തിൽ സംസാരിക്കുകയായിരുന്നു അദ്ദേഹം,

വിവരം ലഭിക്കാനുള്ള അവകാശം ഭരണഘടന ഉറപ്പുനൽകുന്ന ആർട്ടിക്കിൾ 21 അഥവാ ജീവിക്കാനുള്ള അവകാശത്തിന്റെ ഭാഗമാണ്. അത് നിഷേധിക്കുന്നത് മൗലികാവകാശലംഘനമായി കണക്കാക്കും. അപേക്ഷകൾക്ക് സമയബന്ധിതമായി വിവരങ്ങൾ നൽകാതെ കമ്മിഷൻ റിപ്പോർട്ട് ആവശ്യപ്പെടുമ്പോൾ മാത്രം വിവരം നൽകുന്ന പ്രവണത കാണുന്നുണ്ട്. അത് അപലപനിയമാണ്..

ഓഫീസുമായി ബന്ധപ്പെട്ട എല്ലാ രേഖകളും ക്രോഡീകരിച്ച് പട്ടിക തയ്യാറാക്കി കംപ്യൂട്ടറിലൂടെയോ വെബ്‌സൈറ്റിലൂടെയോ പൊതുജനങ്ങളെ അറിയിക്കാൻ മേലധികാരികൾ ബാധ്യസ്ഥരാണെന്നും അദ്ദേഹം കൂട്ടിച്ചേർത്തു. അദാലത്തിൽ പരിഗണിച്ച 17 ഹർജികൾ തീർപ്പാക്കി. കൂടുതൽ അപേക്ഷകളും പഞ്ചായത്ത് റവന്യൂവകുപ്പുമായി ബന്ധപ്പെട്ടവയാണ്. ചില അപേക്ഷകളിൽ വിവരം നൽകാത്ത ഉദ്യോഗസ്ഥർക്കെതിരേ ശിക്ഷാനടപടികൾ സ്വീകരിച്ചിട്ടുണ്ട്.