വടകരയിൽ നിയന്ത്രണം വിട്ട കാർ കടയിലേക്ക് ഇടിച്ചുകയറി; സ്ത്രീക്ക് പരിക്ക്

വടകര: കരിമ്പനപ്പാലം-പഴയ ബസ് സ്റ്റാൻഡ് റോഡിൽ നിയന്ത്രണം വിട്ട കാർ കടയിലേക്ക് പാഞ്ഞുകയറി സ്ത്രീക്ക് പരിക്ക്. പാസ്‌പോർട്ട് സേവാ കേന്ദ്രത്തിന് സമീപം ബുധനാഴ്ച രാവിലെ എട്ടു മണിയോടെയായിരുന്നു അപകടം. റോഡരികിലെ ഹോട്ടലിൽ നിന്ന് ചായ കുടിച്ച് പുറത്തിറങ്ങിയ കരിമ്പനപ്പാലം സ്വദേശി ദിവ്യയ്ക്കാണ് പരിക്കേറ്റത്. ഇവരെ വടകര സഹകരണ ആശുപത്രിയിലും തുടർന്ന് വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.

​കരിമ്പനപ്പാലം ഭാഗത്തുനിന്നും വരികയായിരുന്ന കാർ റോഡരികിൽ നിർത്തിയിട്ടിരുന്ന ഓട്ടോറിക്ഷയിലും സ്കൂട്ടറിലും ഇടിച്ച ശേഷമാണ് 'ഷേഡ് ഗ്ലാസ് കൂളിംഗ്' എന്ന കടയിലേക്ക് ഇടിച്ചുകയറിയത്. അപകടത്തിൽ കടയുടെ മുൻവശത്തെ തൂണും പരസ്യബോർഡും തകർന്നു. ഓട്ടോറിക്ഷയ്ക്കും സ്കൂട്ടറിനും കാര്യമായ കേടുപാടുകൾ സംഭവിച്ചിട്ടുണ്ട്.