കോടിയേരി മാരക ഗവ. കോളേജ്; മൂന്ന് കെട്ടിടങ്ങളുടെ ഉദ്ഘാടനം ഇന്ന്

ചൊക്ലി : തലശ്ശേരി കോടിയേരി ബാലകൃഷ്‌ണൻ സ്‌മാരക ഗവ. കോളേജിൽ നിർമാണം പൂർത്തീകരിച്ച അക്കാദമിക് ബ്ലോക്ക്, വനിതാ ഹോസ്റ്റൽ, കാൻ്റീൻ എന്നീ മൂന്ന് കെട്ടിടങ്ങളുടെയും ഉദ്ഘാടനം വ്യാഴാഴ്‌ച രാവിലെ 9.30-ന് മന്ത്രി ആർ.ബിന്ദു നിർവഹിക്കും. സ്‌പീക്കർ എ.എൻ.ഷംസീർ അധ്യക്ഷത വഹിക്കും.

2020-ൽ സംസ്ഥാന സർക്കാർ കിഫ്‌ബി പദ്ധതിയിൽപ്പെടുത്തി അനുവദിച്ച 11.20 കോടി രൂപ ഉപയോഗിച്ചാണ് കെട്ടിടങ്ങളുടെ നിർമാണം പൂർത്തീകരിച്ചത്. നിലവിൽ ബി.എ. ഹിസ്റ്ററി, ബി.കോം., ബി.സി.എ. എന്നീ മൂന്ന് ബിരുദ കോഴ്‌സുകളും എം.എസ്സി. കംപ്യൂട്ടർ സയൻസ് ബിരുദാനന്തര കോഴ്സുമാണുള്ളത്. 450 വിദ്യാർഥികൾ ഇവിടെ പഠിക്കുന്നുണ്ട്. ഹോസ്റ്റലുൾപ്പെടെ അടിസ്ഥാനസൗകര്യം വർധിച്ച സാഹചര്യത്തിൽ പുതിയ കോഴ്സുകൾ പ്രഖ്യാപിച്ചേക്കുമെന്ന പ്രതീക്ഷയിലാണ് നാട്ടുകാർ.