വിലങ്ങാട് പുനരുദ്ധാരണം വേഗത്തിലാക്കണം - ഐ. എൻ. ടി. യു. സി.

വിലങ്ങാട് മേഖലയിലെ പുനരുദ്ധാരണ പ്രവർത്തനങ്ങൾ അടിയന്തരമായി പൂർത്തിയാക്കണമെന്ന് ഐ.എൻ.ടി.യു.സി (INTUC) ചുമട്ടുതൊഴിലാളി യൂണിയൻ വാർഷിക ജനറൽ ബോഡി യോഗം ആവശ്യപ്പെട്ടു. ഉരുൾപൊട്ടലിൽ കനത്ത നാശനഷ്ടങ്ങൾ സംഭവിച്ച വിലങ്ങാടിന്റെ പുനർനിർമ്മാണം വേഗത്തിലാക്കാൻ സർക്കാർ തയ്യാറാകണമെന്ന് യോഗം പ്രമേയത്തിലൂടെ ആവശ്യപ്പെട്ടു. ഐ.എൻ.ടി.യു.സി ഫെഡറേഷൻ സംസ്ഥാന ജനറൽ സെക്രട്ടറി മോഹനൻ മടപ്പള്ളിയാണ് വാർഷിക യോഗം ഉദ്ഘാടനം ചെയ്തത്.

​ചടങ്ങിൽ വാണിമേൽ പഞ്ചായത്ത് മെമ്പറായി തിരഞ്ഞെടുക്കപ്പെട്ട ഐ.എൻ.ടി.യു.സി മേഖല പ്രസിഡന്റ് ഷെബി സെബാസ്റ്റ്യന് സ്വീകരണം നൽകി. കൂടാതെ മുതിർന്ന പ്രവർത്തകരായ ബേബി തേക്കേൽ, പി.ജി. സുകുമാരൻ എന്നിവരെ ആദരിക്കുകയും തൊഴിലാളികൾക്കുള്ള അടുത്ത വർഷത്തെ കാർഡുകൾ വിതരണം ചെയ്യുകയും ചെയ്തു. പി. ബാലകൃഷ്ണൻ അധ്യക്ഷത വഹിച്ച യോഗത്തിൽ കെ.ടി.കെ അശോകൻ, ഷെബി സെബാസ്റ്റ്യൻ, ജോസ് ഇരുപ്പക്കാട്ട് തുടങ്ങിയവർ സംസാരിച്ചു.

​യൂണിയന്റെ പുതിയ ഭാരവാഹികളായി പി. ബാലകൃഷ്ണൻ (പ്രസിഡന്റ്), അനാസർ ടി. (ജനറൽ സെക്രട്ടറി), ബിജു മഴുവഞ്ചേരി (ഖജാൻജി) എന്നിവരെ തിരഞ്ഞെടുത്തു. വൈസ് പ്രസിഡന്റുമാരായി ബേബി മുല്ലക്കുന്നേൽ, ജ്യോതിഷ് ആന്റണി എന്നിവരെയും സെക്രട്ടറിമാരായി രാജു പറക്കാട്, ബിനീഷ് എം.സി എന്നിവരെയുമാണ് നിശ്ചയിച്ചിട്ടുള്ളത്.