വോട്ടിങ് യന്ത്രം പരിചയപ്പെടാൻ വോട്ടുവണ്ടി ഓടിത്തുടങ്ങി

കല്പറ്റ: നിയമസഭാ തിരഞ്ഞെടുപ്പിന് മുന്നോടിയായി വോട്ടർമാരെ ബോധവത്കരിക്കുന്നതിനും പൊതുജനങ്ങൾക്ക് ഇലക്ട്രോണിക് വോട്ടിങ് യന്ത്രം, വിവിപാറ്റ് എന്നിവ പരിചയപ്പെടുത്താനും ജില്ലയിൽ വോട്ടുവണ്ടി പര്യടനം തുടങ്ങി. കളക്ട‌റേറ്റിൽ നിന്ന് പര്യടനം തുടങ്ങിയ വോട്ടുവണ്ടി കളക്‌ടർ ഡി.ആർ. മേഘശ്രീ ഫ്ളാഗ് ഓഫ് ചെയ്തു.

കല്പറ്റ, മാനന്തവാടി, സുൽത്താൻബത്തേരി മണ്ഡലങ്ങളിൽ വോട്ടർമാരെ ബോധവത്കരിക്കുന്നതിന് മൂന്ന് വോട്ടുവണ്ടികൾ പര്യടനം നടത്തും. പൊതുജനങ്ങൾക്ക് രാവിലെ 10 മുതൽ വൈകീട്ട് അഞ്ചുവരെ വോട്ട് വണ്ടികളുടെ സേവനം ഉപയോഗിക്കാം. തിരഞ്ഞെടുപ്പ് വിഭാഗം ഡെപ്യൂട്ടി കളക്ട‌ർ നിജു കുര്യൻ, എൽ.ആർ. ഡെപ്യൂട്ടി കളക്‌ടർ കെ. മനോജ് കുമാർ, എൽ.എ. ഡെപ്യൂട്ടി കളക്‌ടർ എം.കെ. ഇന്ദു, ഇലക്ഷൻ അസി. ബിനു എന്നിവർ പങ്കെടുത്തു.