രണ്ടാം ക്ലാസ് വിദ്യാർത്ഥിനിയെ പീഡിപ്പിച്ച കേസ്; പ്രതിക്ക് ആറ് വർഷം കഠിനതടവ്.

നാദാപുരം: രണ്ടാം ക്ലാസ് വിദ്യാർത്ഥിനിയെ ലൈംഗികമായി പീഡിപ്പിച്ച കേസിൽ പ്രതിക്ക് ആറ് വർഷം കഠിനതടവും പതിനായിരം രൂപ പിഴയും ശിക്ഷ വിധിച്ചു. പേരാമ്പ്ര കൽപ്പത്തൂർ സ്വദേശിയായ തട്ടാൻകണ്ടി ഉന്നതിയിലെ ദാമോദരനെയാണ് (62) നാദാപുരം ഫാസ്റ്റ് ട്രാക്ക് സ്പെഷ്യൽ കോടതി ജഡ്ജ് ദേവൻ കെ. മേനോൻ ശിക്ഷിച്ചത്. ഒരു വിവാഹ ചടങ്ങിനിടെയാണ് പ്രതി പെൺകുട്ടിക്ക് നേരെ അതിക്രമം നടത്തിയത്.

​ഉപദ്രവിക്കപ്പെട്ട വിവരം കുട്ടി സ്കൂൾ അധ്യാപികയെ അറിയിച്ചതിനെ തുടർന്ന് സ്കൂൾ അധികൃതർ പേരാമ്പ്ര പൊലീസിൽ പരാതി നൽകുകയായിരുന്നു. എസ്‌ഐ കെ. സജി അഗസ്റ്റിൻ, എഎസ്‌ഐ സി. ശ്രീജ എന്നിവരുടെ നേതൃത്വത്തിലാണ് കേസ് അന്വേഷണം പൂർത്തിയാക്കിയത്. വിചാരണ വേളയിൽ ഒമ്പത് സാക്ഷികളെ വിസ്തരിക്കുകയും 14 പ്രധാന രേഖകൾ കോടതിയിൽ ഹാജരാക്കുകയും ചെയ്തു. പ്രോസിക്യൂഷന് വേണ്ടി സ്പെഷ്യൽ പ്രോസിക്യൂട്ടർ മനോജ് അരൂർ കോടതിയിൽ ഹാജരായി.