വടകരയിലെ ഒരു തണൽകൂടി മാഞ്ഞു

വടകര : പട്ടണത്തിലെ ഒരു തണൽകൂടി മാഞ്ഞു. അഞ്ചുവിളക്ക് ജങ്ഷനുസമീപം തണൽവിരിച്ചുനിന്ന മാവാണ് കഴിഞ്ഞദിവസം മുറിച്ചുമാറ്റിയത്. പുതുതായി നിർമിച്ച കുടുംബകോടതി കെട്ടിടത്തിനുമുന്നിലാണ് ഈ മാവ്. കെട്ടിടത്തിന് അസൗകര്യമാകുമെന്നതിന്റെ പേരിലാണ് മുറിച്ചത്. ശിഖരങ്ങൾ വെട്ടി നിലനിർത്താമായിരുന്നുവെന്ന വാദം പരിസ്ഥിതിപ്രേമികൾ ഉയർത്തുന്നുണ്ട്. പൂർണമായും മുറിച്ചുമാറ്റിയതോടെ പകൽസമയത്ത് ശക്തമായ വെയിലാണ് ഇവിടെ. ഇവിടത്തെ ഓട്ടോസ്റ്റാൻഡിലെ ഡ്രൈവർമാർക്കും ഇതുവഴിപോകുന്ന യാത്രക്കാർക്കുമെല്ലാം തണലായിരുന്നു ഈ മാവ്.