നവമാധ്യമങ്ങളിലെ തെറ്റായ പ്രചാരണങ്ങൾക്കെതിരേ നിയമനടപടികൾ വേണം -വനിതാ കമ്മിഷൻ

കാസർകോട്: നവമാധ്യമങ്ങളിൽ സ്ത്രീകൾക്കെതിരേയുള്ള തെറ്റായ പ്രചാരണങ്ങൾക്കെതിരേ ശക്തമായ നിയമനടപടി വേണമെന്ന് സംസ്ഥാന വനിതാ കമ്മിഷൻ അംഗം അഡ്വ. പി. കുഞ്ഞായിഷ പറഞ്ഞു. കളക്‌ടറേറ്റ് മിനി കോൺഫറൻസ് ഹാളിൽ നടന്ന ജില്ലാ അദാലത്തിൽ സംസാരിക്കുകയായിരുന്നു അവർ. പരാതിയുമായി വരുന്ന സ്ത്രീകളെ മാനസികമായി തളർത്തുന്ന അഭിപ്രായപ്രകടനങ്ങൾ ശരിയല്ല. ഇത് പരാതിയിൽനിന്ന് സ്ത്രീകൾ പിന്നോട്ടുപോകാൻ ഇടയാക്കുമെന്നും അവർ വ്യക്തമാക്കി.

അദാലത്തിൽ 33 പരാതികൾ പരിഗണിച്ചതിൽ 15 എണ്ണം തീർപ്പാക്കി. 14 പരാതികൾ അടുത്ത അദാലത്തിൽ പരിഗണിക്കും. വനിതാ കമ്മിഷൻ പാനൽ അംഗം അഡ്വ. ഇന്ദിരാവതി, വനിതാ സെൽ എഎസ്ഐമാരായ യു.കെ. സരള, പി.ജെ. സക്കീന, ജീവനക്കാരായ ടി.ആർ. ജയന്തി, വൈ.എസ്. പ്രീത എന്നിവർ അദാലത്തിൽ പങ്കെടുത്തു.