പോലീസിന് സർവസ്വാതന്ത്ര്യം -മുഖ്യമന്ത്രി

തിരുവനന്തപുരം : അന്വേഷണത്തിൽ പോലീസിന് പൂർണ സ്വാതന്ത്ര്യമാണ് ഇപ്പോഴുള്ളതെന്നും ഒരുതരത്തിലുള്ള ബാഹ്യ ഇടപെടലും പോലീസിൻ്റെ മേലില്ലെന്നും മുഖ്യമന്ത്രി പിണറായി വിജയൻ. പോലീസ് ആരെയും ചാരിനിൽക്കുകയോ പ്രത്യേകമായി സംരക്ഷിക്കുകയോ ചെയ്യുന്നില്ല. തെളിവുകളുടെ അടിസ്ഥാനത്തിൽ തുടർനടപടിയെടുക്കാൻ സാധിക്കുന്നത് അതുകൊണ്ടാണെന്നും മുഖ്യമന്ത്രി വ്യക്തമാക്കി.

പോലീസ് ട്രെയിനിങ് കോളേജിൽ നടന്ന പടങ്ങിൽ വിവിധ ജില്ലകളിലെ പോലീസ് കെട്ടിടങ്ങളുടെയും റെയിൽ മൈത്രി മൊബൈൽ ആപ്ലിക്കേഷന്റെയും ഉദ്ഘാടനം നിർവഹിക്കുകയായിരുന്നു അദ്ദേഹം.

കേരളത്തിൽ വർഗീയസംഘർഷങ്ങൾ ഇല്ലാതാക്കുന്നതിൽ പോലീസ് നിർണായക പങ്കുവഹിക്കുന്നുണ്ട്. മുൻപ് ഇതായിരുന്നില്ല സ്ഥിതി. പോലീസിന് സ്വതന്ത്രമായി പ്രവർത്തിക്കാൻ കഴിയുന്നതുകൊണ്ടാണ് സംസ്ഥാനത്ത് സമാധാനാന്തരീക്ഷം നിലനിൽക്കുന്നതെന്നും മുഖ്യമന്ത്രി പറഞ്ഞു.

മന്ത്രി വി.ശിവൻകുട്ടി അധ്യക്ഷനായി. മറ്റു ജില്ലകളിലെ പ്രാദേശികമേഖലകളിൽ ഓൺലൈനായി ചടങ്ങുകൾ സംപ്രേഷണം ചെയ്തു. ഐ.ജി. ആർ.നിശാന്തിനി, എ.ഡി.ജി.പി.എസ്.ശ്രീജിത്ത്, ഡി.ജി.പി. റവാഡ ചന്ദ്രശേഖർ, ഐ.ജി. ഗുഗുലോത്ത് ലക്ഷ്‌മൺ എന്നിവർ സംസാരിച്ചു.